5 skuadra pjesëmarrëse, të kualifikuara nga faza e parë, ku përveç investitorit përfshijnë edhe arkitektë, kanë paraqitur projektet për rijetëzimin e stadiumit ‘Selman Stërmasi’, që bashkë me korridorin para tij përfshijnë një territor prej 60 mijë metrash katrorë.
Prezantimi i projekt-ideve u bë para një jurie ndërkombëtare, me qëllim shpalljen e një fituesi që do të ndërtojë stadiumin, që do të funksionjë edhe si qendër urbane. Në pranishëm në event ishte edhe kryeministri Edi Rama, i cili u shpreh se stadiumi dhe do të ketë standartet e UEFA-s, kategoria IV.
Kreu i qeverisë u ndal edhe te projektet e tjera, si qendra e re administrative që do të ndërtohet pranë këtij stadiumi dhe do të akomodojë 18 institucione. Së shpejti, tha Rama, pritet të hapet konkursi edhe për Bibiliotekën e re Kombëtare, ndërsa janë në bisedime edhe për të sjellë në Durrës një tjetër akademi, atë të NBA.
“Janë qendra të reja urbane, në Durrës, Vlorë dhe Korçë. Tani i vjen radhë stadiumit Selman Stërmasi, edhe ky sipas kërkesës së bërë për studiot është një tjetër bërthamë për një qendër të re urbane, që jam i bindur që duke pasur parasysh konkurrentët, do të jemi në kushtet ku do të bëjmë një zgjedhje të mirë. Dua të përmenden këtu edhe disa procese të tjera të filluara, ndërtimin e qendrës së re administrative që do të akomodojë 18 institucione, për ndërtimin e godinës së re të Kadastrës, biblioteka e re kombëtare me një konkurs që do të shpallet së shpejti. Ndërkohë që po punohet dhe është në kantier akademia e Manchester City në Durrës, së shpejti edhe akademinë e Nadal në Durrës. Agjencia është në diskutime me NBA për akademinë e NBA po në Durrës, ku duam të ndërtojmë një destinacion akademish sportive.”, u shpreh kryeministri.
Rama njoftoi gjithashtu se po punojnë edhe projektin e sistemit të ri të parkimeve në Tiranë dhe bregdet. Sipas kreut të qeverisë, në Tiranë do të mbahet së shpejti edhe Festivali Ndërkombëtar i Arkitekturës.
“Në fund, së shpejti po ashtu, e them këtë se e di që këtu ka jo pak përfaqësuesish kompanish, IC do të shpallë edhe proceset për ndërtimin e një sistemi të ri parkimesh në kryeqytet dhe bregdet, ku ne do të përfshijmë të gjithë arkitektët ndërkombëtarë, me të cilët do të organizojmë edhe festivalin e arkitekturës në fillim të qershorit. Për parkimet, është t’i përgjigjemi një sfide të madhe që është nevoja për më tepër parkime dhe për një sistem të pranueshëm të qarkullimit që ka filluar të japë shenja vështirësie të dukshme.”, tha Rama.
Pjesë e programit ‘Ura për Shqipërinë 2030’, stadium i ri “Selman Stërmasi” do të jetë i kategorisë 4 të UEFA, me një numër vendesh nga 14 mijë deri në 16 mijë tifozë. E gjithë zona është konceptuar si një mundësi biznesi dhe parashikohet ndërtimin e të paktën një kulle, që përfshin edhe njësi banimi.
Ndër kompanitë e interesuara për të ndërtuar stadiumin e ri “Selman Stërmasi” janë kompania OMA dhe RH DHV të cilat kanë ndërtuar stadiumin e Feyenoord në Roterdam, por edhe kompania ‘Foster & Partners’, që kanë ndërtuar stadiumin e finales së Botërorit 2024 në Katar, i njohur me emrin Lusail dhe që ka një kapacitet prej 88 mijë tifozësh.
Komente
Po mire ndonje uzine apo fabrike do ndertohet ndonjehere ne kete vend ?
Përgjigju