Çdo ditë në pediatrinë e spitalit rajonal të Beratit paraqiten për tu vizituar 40 deri 50 fëmijë. Fluksi vjen në rritje bën të ditur Shefi i Repartit të Pediatrisë, Vladimir Kumaraku. Kryesisht fëmijët janë të prekur nga viroza stinore por nuk mungojnë as rastet me COVID-19 në moshat pediatrike.
"Situata virale karakterizohet nga, temperatura e lartë, shpeshherë me ethe, me kollë dhe frymëmarrje të shpejtë. Po kështu kemi pasur edhe raste kur ka qenë prezent COVID-19 që përpos këtyre simptomave shoqërohet me çrregullime gastro-intensinale", u shpreh mjeku pediatër.
Mjeku pediatër këshillon prindërit që të mos paraqiten në spital, kur fëmija ka simptoma të lehta, dhe të përdorin antibiotikët pa recetë.
"Jo sapo të nisë temperatura, familjarët të shkojnë direkt në spital, të paktën në rastet kur fëmija ka vetëm temperatura dhe jo shenja të tjera si kollë apo diarre duhet që prindërit t'i mbajnë fëmijët në shtëpi së paku dy ditë dhe të paraqiten në spital vetëm ditën e 3 nëse nuk ka përmirësim", shtoi ai.
Për të shmangur grumbullimet në spital, Kumaraku i drejton një apel edhe Ministrisë së Shëndetësisë, duke kërkuar që testimi për COVID-19 të bëhet nëpër qendrat shëndetësore.
"Të kryhet tamponi i shpejtë për COVID-19 nëpër qendrat shëndetësore, të bëhet ndjekja fillimisht nga mjeku i familjes, sepse do të shmangej grumbullimi në spital, ku rreziku i përhapjes së virusit është më i madh", u shpreh mjeku.
Situata virale karakterizohet nga temperatura të larta, ethe, çrregullime të aparatit tretës, me kollë, ndërkohë që në rastet e fëmijëve me COVID, përveç këtyre simptomave fëmijët kanë shfaqur edhe çrregullime gastro-intensinale, si diarreja dhe të vjellat.
