Një ngjarje që po shndërrohet në një atraksion kulturor e turistik, ku vizitorët shijojnë kulinarinë tradicionale dhe marrin pjesë në aktivitete të ndryshme, është Festa e Koranit në Pogradec.
Në vitin e dytë radhazi, programi përfshin ekspozita fotografike për historinë e peshkimit, gatime tradicionale, hedhjen e rasatit në liqen si dhe një koncert festiv që mblodhi bashkë banorë e turistë. Për kryebashkiakun është e rëndësishme pasurimi i traditës vitin e ardhshëm.
'Festa e koranit do të jetë edhe pasuese për krapin duke qenë se kjo është një specie që po zhduket’, tha Ilir Xhakolli, kryebashkiak i Pogradecit.
Vetëm këtë vit do të hidhen rreth 2 milion rasat, shifër rekord krahasuar me vitin e kaluar. Shtimi i koranit në mënyrë të kontrolluar shihet si garanci për mbrojtjen e tij në Liqenin e Pogradecit.
'Sot janë hedhur 50 mijë rastë korani dhe kjo është sasi e vogël në krahasim me rasatin që hidhet në liqen çdo vitë’, tha Martin Jaçe nga organizata e Menaxhimit të Peshkimit.
Ndërkohë, restorantet e zonës e konsiderojnë koranin si pjatën kryesore të kuzhinës lokale, por çmimi është në rritje, një kilogram shitet rreth 4,500 lekë. Furnizimi bëhet gjithnjë e më i vështirë, sidomos gjatë verës.
Shefi i njohur i kuzhinës, Erton Yzo, nënvizon se gatimi i koranit në Pogradec ka një traditë të hershme.
‘Është peshk që ka histori në vendin tonë. Është peshk që preferohet shumë në restorante’, tha ai.
Festa e koranit tashmë është shndërruar në një nga ngjarjet më të rëndësishme të Pogradecit, duke e forcuar identitetin kulturor dhe duke e pozicionuar qytetin si një destinacion unik për kulinarinë dhe turizmin liqenor.
Komente
