Një ngjarje e re artistike bëhet pjesë e kalendarit kulturor të Tiranës, duke sjellë në vëmendje pianistët e rinj. Bëhet fjalë për Konkursin Ndërkombëtar Frederik Shopen, që në të njëjtën kohë do të jetë një garë mes qindra muzikantëve të rinj nga Shqipëria, Kosova, Maqedonia e Veriut dhe vende të ndryshme të botës. Konkursi do të organizohet në datat 1 deri më 6 mars me rastin e 215-vjetorit të lindjes së Frederik Shopen dhe 30-vjetorit të Shoqatës që mban emrin e tij.
“Pse duhet ky konkurs? Duhet për arsye se në vendin tonë organizohen shumë aktivitete, në rast se ka një specialitet që ka ecur në këto vite pianoja është ndër të parat. Nga ana tjetër është e rëndësishme se aktivitetet e shumta në këtë drejtim kanë krijuar njëfarë qerthulli, që ka nevojë për ballafaqim edhe me shkollat e tjera të Evropës. Pra kjo do ndikojë, që talentet e Shqipërisë që nuk kanë munguar të kenë mundësi të ballafaqohen me këto arritje, pra i shërben konsolidimit të shkollës sonë të pianos, por dhe konfrontimit mes kulturave të ndryshme. Ky konkurs i parë ndërkombëtar ka diçka të rëndësishme: duke pasur në qendër materien bazë që është krijimtaria e Shopenit, konfrontimi është në nivelin më të lartë të mundshëm.”, shprehet Zhani Ciko, ideator i këtij aktiviteti dhe drejtues i tij.
Kjo nismë ka pasur mbështetjen e disa institucioneve, si: Ambasada e Polonisë në Shqipëri, Instituti Italian i Kulturës, Ministria e Kulturës, Ministria për Europën dhe Punët e Jashtme apo Teatri Kombëtar i Operës dhe Baletit.
“Muzika e Frederik Shopenit është mbase më e çmuara që kultura polake mund t’i ofrojë botës. Vlera qëndron veçanërisht në faktin që është njëkohësisht trashëgimia jonë kombëtare që inagurohet dhe në të njëjtën kohë ka vlerë universale dhe i flet shpirtit njerëzor kudo në botë.”, - thotë ambasadori i Polonisë në Shqipëri, Wojchiech Unolt.
“Jam shumë i lumtur të mirëpresim konkursin e parë rinor ndërkombëtar pianistik dedikuar Shopenit. Ky është një lajm shumë i rëndësishëm se konkurse të tilla janë me të vërtetë të dobishme dhe shumë të rëndësishme për ballafaqimin e kulturave, se të kesh konkurse të tilla afron pianist dhe student nga gjithë bota dhe mund të jetë një festë e madhe dedikuar instirumetit të pianos. Jam shumë i lumtur që Teatri i Operas është shtëpia e këtyre artistëve të rinj.”, - vëren drejtori i Teatrit Kombëtar të Operas dhe Baletit, Aulon Naçi.
“Për mua është kënaqësi e madhe të jem këtu dhe të ofroj një mbështetje për festivalin. E para, më bëhet qejfi se angazhohen artistë dhe pianistë italianë, që edhe forcojnë më tej traditën e bashkëpunimit mes dy vendeve. Por ka dhe dy arsye të tjera: Lind një festival i ri, që ka si objekti të rinjtë dhe ka perspektivën e rritjes dhe kontribuon për t’i dhënë Tiranës dhe Shqipërisë rëdësinë që duhet të kenë në panoramën ndërkombëtare.”, - nënvizon drejtuesi i Institutit Italian të Kulturës në Tiranë, Alessandro Ruggera.
Me një juri të përzgjedhur me pianistë e muzikantë të njohur ndërkombëtarisht nga Polonia, Italia, Gjermania e Franca do të gjykohet interpretimi i artistëve të rinj ndërkohë që gara do të ndahet në disa faza. Në konkurs marrin pjesë tri kategori: Kategoria e parë (deri 10 vjeç), Kategoria e dytë (11-15 vjeç), Kategoria e tretë (16-20 vjeç) Kategoria e katërt (21-26 vjeç) Kategoria “Ekstra” (deri në 15 vjeç, për adhuruesit e pianos dhe muzikës të F. Shopen). Pjesëmarrësit do të interpretojnë vepra nga F. Shopen dhe kompozitorë të tjerë, si dhe vepra të kompozitorëve shqiptarë. Përveç çmimit të madh, konkursi jep 4 çmime të para, 4 çmime të dyta, 4 çmime të treta, çmimin “Shqiponja”, çmime speciale, diploma dhe çertifikata.
Komente
