FIER- Rruga e amortizuar që të çon drejt pikës turistike të Gurëzezës dhe shpopullimi i fshatrave kanë bërë që Dita e Verës e cila përkon dhe me ditën e Baba Refatit të festohet në një atmosferë të vakët, me pjesëmarrje të ulët kahasuar me vitet e mëparshme.
Pavarësisht vështiresive të rrugës, banorët, pjesa më e madhe e të cilëve janë shpërngulur në Fier, këtë të premte u ngjitën në Gurëzezë. Segmenti rrugor prej 4 kilometrash është tërësisht i amortizuar, ndaj përshkohet vetëm me fuoristrada. Ndërsa ata që nuk kanë makina 4*4, e ngjitën kodrën me hajvanë.
Festa shoqërohet me kurban dhe ndezje qirinjsh në teqenë 400- vjecare të Baba Refatit. Për bektashinjtë, teqeja konsiderohet vend i shenjtë.
Gurëzeza është një atraksion turistik në Cakran të Fierit. Shtrihet në një kodër rreth 520 m mbi nivelin e detit që është plot me histori ilire dhe bukuri natyrore.
Arkeologët kanë vlerësuar se Gurëzeza, emri antik i së cilës mendohet të jetë Barbyli, është po aq e rëndësishme për trashëgiminë kulturore sa Apolonia apo Bylisi. Gjetjet e neolitit të mesëm janë të shumta dhe përfaqësojnë një fazë më vete të zhvillimit kulturor të kësaj zone.
Komente
