Kanë rinisur kërkimet për gjetjen e 26 vjeçarit Mateo Lika i cili është raportuar i zhdukur që prej tre ditësh pasi dyshohet se ka rënë me makinë në ujërat e lumit Seman. Ditën e djeshme, kërkimet shkuan deri në 1 kilometër larg vendit ku dyshohet se makina ra në lumë por nuk u gjet asnjë gjurmë.
Njësia speciale e repartit të Reneas, ka nisur sërish kërkimet pranë zonës ku dyshohet se ka rënë mjeti që drejtonte Mateo Lika. Deri më tani, e vetmja provë që mjeti mund të ketë rënë në lumë, është targa e mbetur në parmakët e Urës së Mbrostarit. Kërkimi po kryhet me dedektor.
I riu kishte ardhur nga Gjermania për pushime në Fier dhe kishte marrë me qera makinën me të cilën dyshohet se re në lumin Seman. Ai ka qenë i vetëm në mjet, ndërsa prej 3 ditësh familjarët nuk kanë asnjë lajm prej tij. Në vendin ku po kryhen kërkimet, ndodhen edhe familjarë të 26 vjeçarit.
