FIER- Gjyqtari i Fierit, Vladimir Cjapi dhe familjarët e tij, janë marr në mbrojtje, pas denoncimit për kanosje nga Arben Isufi, i njohur me nofkën Ben Qimja.
Forca elitë RENEA dhe Policia e Fierit bastisën ditën e sotme (20 shkurt), shtëpinë e Arben Isufi. Kontrolli u bë me vendim të Gjykatës së Fierit, pas kallëzimit të gjyqtarit të Shkallës së Parë, Vladimir Cjapi, se Ben Qimja e ka kërcënuar për shkak të detyrës.
Sipas gjyqtarit të Fierit Vladimir Cjapi, kërcënimi është bërë në datën 12 shkurt, ndërsa kallëzimi është bërë pranë Prokurorisë së Fierit 5 ditë më vonë, më 17 shkurt. Ende nuk dihen detaje përse është kërcënuar gjyqtari ose nëse Ben Qimja apo të afërm të tij të kenë ndonjë cështje të hapur me drejtësinë
Gjatë kontrolleve, Ben Qimja nuk u gjet në banesën e tij në lagjen Sheq i Madh në Fier. Por aty, në automjete dhe ambiente në pronësi të tij, policia gjeti 1 pistoletë, 2 targa të huaja, jelek të policisë, 2 pajisje DVR, 6 celularë dhe dokumente zyrtarë. Sipas Policisë së Fierit, këto sende të sekuestruara do t’i shërbejnë hetimit.
Burime për Report Tv thonë se disa nga dokumentet e gjetura, janë vendime gjykatash, shkresa prokurorie, jo në emër të Ben Qimes, por për persona të tjerë, të cilat pritet të analizohen nga grupi hetimor.
55-vjeçari është shpallur në kërkim për veprat penale “Kanosja e gjyqtarit” dhe "Prodhimi dhe mbajtja pa leje e armëve, armëve shpërthyese dhe municionit".
'Me qëllim hetimin e plotë të rastit, Policia ka sekuestruar sende që do t’i shërbejnë hetimit, si dhe ka shoqëruar shtetas të lidhur me shtetasin Arben Isufi', njoftoi sot policia.
Ben Qimja ka qenë subjekt i ligjit “Antimafia” dhe në vitin 2023, me vendim të gjykatës së Posaçme, iu konfiskua pasuri e pajustifikuar e që dyshohet se rrjet nga krimi, një pulari, 33% të aksioneve të një kompanie, mijëra metra katror tokë truall, arë dhe 6 automjete luksoze. Fieraku është përballur disa herë me drejtësinë ne vendin tonë, por rezulton i padënuar me vendim të formës së prerë. 11 vite më parë mori pafajësinë në Itali, në akuzë për trafikimin e lëndëve narkotike nga Holanda në vendin fqinj.
Foto:Unioni i Gjyqtarëve të Shqipërisë
Unioni i Gjyqtarëve të Shqipërisë ka reaguar përmes një deklarate publike pas lajmit se gjyqtari i Fierit, Vladimir Cjap, denoncoi se ishte kërcënuar nga Arben Isufaj ose ndryshe i njohur me nofkën ‘Ben Qimja’.
Në njoftimin zyrtar Unioni i Gjyqtarëve të Shqipërisë u bën thirrje organeve kompetente të veprojnë për të zbardhur këtë ngjarje të rëndë dhe të vendosin përpara përgjegjësisë penale autorin e dyshuar.
Nga ana tjetër ata shprehin edhe shqetësimin për klimën e urrejtjes ndaj gjyqtarëve dhe pasigurisë të krijuar kohët e fundit në ushtrimin e detyrës nga gjyqtarët.
Deklarata e plotë:
Unioni i Gjyqtarëve të Shqipërisë, pasi u njoh me njoftimin në media se gjyqtari i Gjykatës së shkallës së parë të juridiksionit të përgjithshëm Fier është kanosur me jetë për shkak të detyrës së tij si gjyqtar në këtë Gjykatë, dënon me forcë çdo lloj përpjekje e veprim që kanos jetën, shëndetin, pronën e gjyqtarëve dhe familjarëve të tyre.
Unioni u bën thirrje organeve të ndjekjes penale të veprojnë sa më shpejt për të zbardhur këtë ngjarje të rëndë e për të vënë përpara përgjegjësisë penale autorin e dyshuar.
Unioni shpreh shqetësimin për klimën e urrejtjes ndaj gjyqtarëve dhe pasigurisë të krijuar kohët e fundit në ushtrimin e detyrës nga gjyqtarët, pasi deklaratat e veprimet që ndikojnë në krijimin e kësaj klime dhe pasigurie, po kthehen në fenomen shumë të rrezikshëm, jo vetëm për sigurinë e gjyqtarëve por, edhe për vetë shtetin e së drejtës e sundimin e ligjit në vendin tonë.
Unioni bën thirrje për shmagien e këtij fenomeni pasi, nuk ndihmon në rritjen e besimit të publikut tek sistemi gjyqësor, forcimin e pavarësisë së vendim-marrjes së gjykatave dhe forcimin e parimeve themelore të funksionimit të shtetit ligjor dhe demokracisë në vend.
Së fundmi, Unioni i Gjyqtarëve të Shqipërisë dëshiron të theksojë edhe një herë angazhimin e tij maksimal në luftën kundër çdo fenomeni antiligjor dhe joetik të vërejtur në punën dhe jetën e përditëshme të gjyqtarëve, sikurse dëshiron të theksojë edhe angazhimin e tij të plotë në mbrojtje të parimeve kushtetuese të ndarjes së pushteteve, pavarësisë së gjykatave dhe forcimit të sundimit të ligjit dhe shtetit të së drejtës në vend.
Gjyqtari i Fierit, Vladimir Cjapi dhe familjarët e tij, janë marr në mbrojtje, pas denoncimit se ishte kanosur nga Arben Isufaj, i njohur si 'Ben Qimja'.
Përmes një njoftimi Gjykata e Fierit ka dënuar rëndë aktin dhe ka kërkuar që të zbardhet ngjarja.
'Duke marrë shkas nga informacioni paraprak i Policisë së Shtetit në ditën e sotme lidhur me sigurinë e jetës së magjistratit z. Vladimir Cjapi, me funksion gjyqtar në Gjykatën e Shkallës së Parë të Juridiksionit të Përgjithshëm Fier, Gjykata e Shkallës së Parë të Juridiksionit të Përgjithshëm Fier përcjell me shqetësim të thellë këto akte që cenojnë rëndë jetën dhe sigurinë e gjyqtarit, familjes së tij, trupës gjyqësore dhe përbëjnë kërcënim serioz për gjithë sistemin e drejtësisë dhe shoqërinë shqiptare në tërësi. Me kërkesë të Zëvendëskryetarit të Gjykatës së Shkallës së Parë të Juridiksionit të Përgjithshëm Fier, z. Noel Veizi, Këshilli për Mbrojtjen e Magjistratëve ka miratuar kërkesën për mbrojtjen të posaçme të gjyqtarit z. Vladimir Cjapi dhe familjarëve të tij.
Shprehim bindjen se i gjithë opinion publik ndodhet sot përkrah gjyqtarit z. Vladimir Cjapi, familjes së tij dhe Gjykatës së Shkallës së Parë të Juridiksionit të Përgjithshëm Fier, si dhe dënojnë rëndë këtë akt. Gjykata e Shkallës së Parë të Juridiksionit të Përgjithshëm Fier denon aktin kriminal dhe i kërkon organit të akuzës hetimin, zbardhjen e ngjarjes dhe të nxjerrë para përgjegjësisë ligjore personat e përfshirë', thuhet në njoftimin e Gjykatës.
Arben Isufaj, i njohur si 'Ben Qimja'
Arben Isufaj, i njohur si 'Ben Qimja', i cili akuzohet se ka kanosur gjyqtarin e Fierit Vladimir Cjapi, nuk është një emër i panjohur për drejtësinë.
Më 3 maj 2023, GJKKO ka konfiskuar dhjetëra pasuri të Arben Isufit i njohur ndryshe si Ben Qimja, i cili rezulton pronar i disa bizneseve dhe sipërfaqesh toke, që janë vlerësuar se janë produkte të krimit dhe të pajustifikuara financiarisht nga Isufaj.
Në shkurt të vitit të 2020, OFL i nisi Isufajt edhe formularin e vetëdeklarimit të pasurive.
'Ben Qimja' njihet si njeriu që është përballur disa herë me policinë, prokurorinë dhe gjykatat, ku akuzat kanë qenë për trafik ndërkombëtar droge heroinë dhe kokainë nga Holanda, etj, ndërsa tashmë është i lirë, pasi pak vite më parë u rrëzua edhe kërkesa e Italisë për ekstradimin e tij drejt vendit fqinj për trafik kokaine.
Disa herë ai është arrestuar në Shqipëri me sasi të mëdha marijuane, ndërsa ka pasur edhe përballje me policinë. Por në vitin 2009 u vendos edhe fati i tij përfundimtar kur Gjykata e Shkallës së Parë Tiranë, e la të lirë për mungesë provash.
Përsa i përket pasurisë, dyshohet se ai ka mundur të përfitojë shuma të konsiderueshme parash nga aktiviteti kriminal, të cilat dyshohet se i ka investuar në Shqipëri, ku një pjesë të pronave janë të rregjistruara në emër personave që janë rreth familjar.
Komente
SPAKu duhet te merret me Ben qimen. O spak ku je?
PërgjigjuHabitem me faktin si ka mundesi paska frike gjygjtari. Ketu eshte vend i sigurte. Qe nga koha e tahirit e lleshit e balles edhe ky tani qe nuk dihet kush eshte... Shqiperia eshte vend i sigurte thojne me letra. Edhe ju gjygjtaret me letra hecni. Keni frike Ben qimen 1e 50 cm eshte. Njeri i mir pa fjale. Si ka mundesi mbrojtje!? Uaaaaa!
PërgjigjuVladimir cjapi ka qen nje sekser avokat nga me te miret dhe te gjitha leket qe ka mar nga te burgosurit beri pagesën qe u be gjyqtar gjyqtaret dhe prokuroret e Fierit jan aq te korruptuar sa po ju del korrupsioni nga veshet me ne krye violeta shkurtin prokurore nga me te korruptuarat qe ka prokuroria dhe Adelina zarka gjyqtare kan fut te pafajshëm ne burg se skan pas lek dhe kan nxjer ata qe kan bere krime nga me te ndryshmet.nuk dihet sa pasuri kan kto te dyja .me kta te korruptuar duhet te meret shteti ne fillim pastaj te meret me fukarenjtë qe skan buk te han