Fier- Një 50-vjeçar i shpallur në kërkim prej një viti, me vendim të Gjykatës së Fierit, është arrestuar sot (29 janar) nga policia vendore.
I prangosuri është Dashnor Bregu, banues në Dukas të Patosit, i cili akuzohet për dhunë në familje dhe armëmbajtje pa leje.
“Specialistët për Hetimin e Krimeve të Komisariatit të Policisë Fier ndaluan shtetasin e shpallur në kërkim D. B., 50 vjeç, pasi Gjykata e Shkallës së Parë e Juridiksionit të Përgjithshëm Fier, me vendimin e datës 16 prill 2024, i ka caktuar masën e sigurisë "arrest në burg", për veprat penale "dhuna në familje" dhe "prodhimi dhe mbajtja pa leje e armëve, armëve shpërthyese dhe municionit luftarak", bëri me dije policia.
Gazetarja e Report TV, marsela Topi, informon se sipas dosjes hetimore, në muajin mars 2024, Bregu ka ushtruar dhunë ndaj bashkëshortes së tij, në banesë, ku gjatë kontrollit, shërbimet e Policisë gjetën dhe sekuestruan një armë zjarri pistoletë, që e mbante pa leje.
Komente
