FIER- Policia e Fierit ka arrestuar 2 persona dhe për 2 të tjerë ka nisur hetimi, pasi organizonin baste sportive në ambientet e një lokali. Gjatë kontrollit të ushtruar në lokal, policia ka sekuestruar 3 aparate celulare në të cilët u gjetën faqe të basteve sportive me shuma të konsiderueshme në lekë dhe euro dhe biseda për vendosjen e llotove sportive.
Specialistët e Seksionit për Hetimin e Krimeve Ekonomiko-Financiare në bashkëpunim me Seksionin për Mbështetjen Operacionale të Hetimit të DVP Fier, kanë finalizuar operacionin policor të koduar "Game over 2".
Në kuadër të këtij operacioni u arrestuan Lorenc Bako, 31 vjeç dhe Aglen Mustafaj, 23 vjeç, banues në Fier. Ndërkohë nisi hetimi për nënë e bir, pronarë të lokalit ku vendoseshin bastet.
‘Si rezultat i kontrolleve të pandërprera të ushtruara nga shërbimet e Policisë, shtetasit e arrestuar u kapën në flagrancë, në lokalin në pronësi të shtetases M. M. dhe djalit të saj A. M., në lagjen "11 Janari", Fier, duke vënë baste sportive, me celularët e tyre, të cilët u sekuestruan në cilësinë e provës materiale’, njoftoi sot policia.
Materialet procedurale i kaluan Prokurorisë Fier, për veprime të mëtejshme.
Komente
