Hyrja në sezonin e kultivimit të bimëve narkotike kanabis sativa ka vënë në lëvizje edhe strukturat vendore në Fier.
Prefekti i Qarkut, Arben Çuko, ka mbledhur paraditen e sotme (6 Shkurt) në një takim, përfaqësuesit vendorë, ku në fokus ishte lufta ndaj narkotikëve.
Të pranishëm ishin edhe drejtues të policisë, kryetarë të bashkive dhe prokurori i Fierit.
Prefekti ka deklaruar se kjo është periudha në të cilën nisin edhe tentativat për mbjelljen e narkotikëve, ndërkohë që nga ana e të gjitha strukturave policore dhe përgjegjëse në njësitë vendore duhet të ketë angazhim maksimal për parandalimin e këtij fenomeni.
Çuko tha se më problematike mbeten zonat kodrinore dhe pyjore larg zonave të banuara, ku duhen të ushtrohen kontrolle të vazhdueshme.
Prefekti pohoi gjithashtu se njësitë vendore luajnë një rol tepër të rëndësishëm në luftën ndaj bimëve narkotike, ndaj kërkoi një angazhim më të madh në evidentimin e rasteve të tilla. Ndërkohë, kreu i Drejtorisë Vendore të Policisë Fier, Skënder Hitaj, në fjalën e tij pohoi se:
“Strukturat e policisë, në bashkëpunim me pushtetin vendor dhe strukturat e tjera ligjzbatuese, kanë bërë një punë shumë të mirë parandaluese, evidentuese dhe goditëse në luftën kundër kultivimit të bimëve narkotike. Gjatë vitit 2024 janë evidentuar 8 raste, zbuluar 5 raste me 6 autorë, 5 prej të cilëve të arrestuar dhe një të proceduar në gjendje të lirë”.
Hitaj ka pohuar gjithashtu se “trendi i kultivimit të kanabisit ka ardhur në zbritje nga viti në vit dhe me më shumë autorë të arrestuar”.
Komente
Mbjellja eshte ulur por mbjellesit e arrestuar jane shtuar??!!
Përgjigju