FIRENCE- Një 49-vjeçar me origjinë shqiptare u arrestua në zonën e ‘Viale Europa’ në Firence, pasi iu gjetën mbi 100 gramë kokainë të fshehura në çorape.
Agjentët e komisariatit të Policisë së Shtetit në San Giovanni dhe punonjësit e policisë bashkiake kanë hyrë në aksion në kuadër të aktiviteteve të planifikuara së bashku, për parandalimin e trafikut të drogës dhe krimeve të grabitjeve.
Oficerët e kapën të dyshuarin pak momente pasi mori mallin pas një gardhi ku e kishte fshehur dhe e futi në çorape. Informimi nga banorët e zonës bëri që oficerët ta mbikëqyrnin lëvizjen e tij.
Shqiptari, i hipur në një skuter, tentoi të kalonte postbllokun, por u ndalua.
Në tentativë për të mbajtur nën kontroll 49-vjeçarin, një punonjës i policisë bashkiake ka mbetur i plagosur lehtë, me plagë të cilat janë cilësuar të shërueshme në 3 ditë, informon media italiane.
Shqiptari i arrestuar me akuzën e mbajtjes pa leje të lëndëve narkotike, rezistencës ndaj arrestimit dhe plagosjes së një zyrtari publik, me urdhër të Prokurorisë së Firences u dërgua në burgun Sollicciano.
Komente
