Kryetari i Bashkisë së Tiranës, Erion Veliaj, ka reaguar për herë të parë pas fitores së thellë të Partisë Socialiste në zgjedhjet e 11 majit. Veliaj ka falenderuar të gjithë ata që votëbesuan PS për një mandat të katërt qeverisës.
Përmes një postimi në rrjete sociale, Veliaj thekson se shqiptarët dinë të vlerësojnë ndryshimin, punën, zhvillimin dhe e dinë fare mirë që ka vetëm një forcë në këtë vend që mund ta çojë Shqipërinë përpara drejt Europës që kemi ëndërruar: Partia Socialiste e drejtuar nga Edi Rama dhe ekipi i tij.
Edhe pse i izoluar, Veliaj ka thënë në urimin e tij se këto zgjedhje 'fshinë çdo dyshim dhe çdo baltë ndaj PS-së', ndërsa shigjeton Berishën.
“Jam pa fjalë, krejtësisht pa fjalë, përpara kësaj vale të jashtëzakonshme mbështetjeje që fshiu çdo dyshim, çdo pretendim, çdo helm e çdo baltë që iu hodh Partisë Socialiste në këto katër vite. Shqiptarët folën - dhe folën fort! Folën më fuqishëm se çdo herë tjetër, që prej vitit të mbrapshtë 1997, kur i treguan vendin të njëjtit personazh grotesk që guxon të rikthehet përpara shqiptarëve, edhe sot, si të ishte një “ofertë e re”
Nga qelia, Veliaj nuk harron as t’u shprehë mirënjohjen qytetarëve duke thënë se është mirënjohës ndaj tyre.
“Sot, unë jam krenar që jam pjesë e këtij projekti që ka transformuar Shqipërinë... Dua të falenderoj secilin prej jush, nga veriu në jug, nga Amerika në Greqi...”-shkruan Veliaj.
Në fund Veliaj falenderon dhe ekipin e bashkisë Tiranë për kontributin dhe punën e jashtëzakonshme sipas tij.
"Por nuk mungon as një përqafim virtual për Tiranën time të dashur. Jeni të jashtëzakonshëm. Jam krenar për të gjithë ju!”- përfundon Veliaj.
Postimi i plotë
Miqtë e mi,
Nuk di nga t’ia nis. Jam pa fjalë, krejtësisht pa fjalë, përpara kësaj vale të jashtëzakonshme mbështetjeje që fshiu çdo dyshim, çdo pretendim, çdo helm e çdo baltë që iu hodh Partisë Socialiste në këto katër vite.
Shqiptarët folën - dhe folën fort! Folën më fuqishëm se çdo herë tjetër, që prej vitit të mbrapshtë 1997, kur i treguan vendin të njëjtit personazh grotesk që guxon të rikthehet përpara shqiptarëve, edhe sot, si të ishte një “ofertë e re”.
Një gjë kam mësuar unë për shqiptarët: nuk harrojnë dhe nuk mashtrohen.
Ata nuk i besojnë më Saliut & co dhe 11 maji i vuri vulën këtij diskutimi.
Shqiptarët dinë të vlerësojnë ndryshimin, punën, zhvillimin dhe e dinë fare mirë që ka vetëm një forcë në këtë vend që mund ta çojë Shqipërinë përpara drejt Europës që kemi ëndërruar: Partia Socialiste e drejtuar nga Edi Rama dhe ekipi i tij.
Saliu & co nuk kanë vesh ta dëgjojnë zërin e popullit. Nuk kanë pasur kurrë sepse nuk e duan pushtetin për popullin. Që nga viti 2013 e deri sot, pas çdo humbjeje, kanë folur për vjedhje, për komplot, për një popull që nuk i meriton.
Por, nëse ka një gjë që na dallon ne socialistëve nga rivalët tanë është se ne dimë të dëgjojmë. Ne nuk jemi këtu për veten tonë - ne jemi këtu për të punuar, për të ndërtuar një të ardhme më të mirë për të gjithë shqiptarët.
Sot, unë jam krenar që jam pjesë e këtij projekti që ka transformuar Shqipërinë. Jam krenar që kam dhënë një kontribut, sado modest, në këtë rrugëtim të jashtëzakonshëm që qytetarët e mbështetën masivisht në 11 maj me votën e tyre.
Sot ndihem i përunjur përpara kësaj mbështetje masive e dua të falenderoj secilin prej jush, nga veriu në jug, nga lindja në perëndim, nga Amerika në Greqi, nga Anglia në Turqi, që i besuan Partisë Socialiste.
Por, më lejoni që falenderimin më special ta ruaj per Tiranën time të dashur. Për familjen time të dytë. Për kolegët e mi të Bashkisë Tiranë dhe për ekipin e mrekullueshëm të Partisë Socialiste në Tiranë që me punën e përkushtimin e tyre arritën një fitore të paharrueshme.
Jeni të jashtëzakonshëm. Jam krenar për të gjithë ju!
Komente
