Serbi-Presidenti serb Aleksandër Vuçiç pritet të propozojë sot Kuvendit emrin e kandidatit për kryeministër. Lajmi u konfirmua nga një deklaratë e Presidencës për mediat.
“Në bazë të kompetencave kushtetuese, Presidenti i Republikës do t'i propozojë Kuvendit Kombëtar një kandidat për Kryeministër, pasi të dëgjojë mendimet e përfaqësuesve të listave të përzgjedhura zgjedhore”, njoftoi Presidenca.
Afati për zgjedhjen e qeverisë së re në Asamblenë Kombëtare skadon më 18 prill në mesnatë.
Ndërkohë Vuçiç tha javën e kaluar se formimi i qeverisë së re ka si symim të kompensojë çdo gjë që ka ndodhur gjatë këtyre muajve.
“Nuk kam dashur të kem ndikim vendimtar, përveçse u kam thënë se cilat janë detyrat e rëndësishme para qeverisë së ardhshme, çfarë duhet të bëjë ajo qeveri, sa duhet të bëjë, sa duhet të kompensohet gjithçka që kemi humbur në muajt e terrorit”, tha Vuçiç.
Ai theksoi se “duhet ta kthejmë sigurinë në shtëpitë tona, fëmijët në shkolla dhe Serbinë duhet ta kthejmë në rrugën e suksesit dhe fitoreve që i kemi pasur të panumërta në vitet e kaluara”.
Autoritetet serbe janë përballur me në sërë protestash që nga nëntori i vitit të kaluar, kur shembja e një çatie në stacionin hekurudhor të Novi Sadit shkaktoi vdekjen e 15 personave. Shumë qytetarë e fajësojnë korrupsionin për këtë tragjedi, pasi Vuçiç kishte përuruar renovimet e stacionit në 2022.
Protestuesit kërkojnë përgjegjësi për tragjedinë në Novi Sad dhe transparencë nga institucionet. Deri më tani, mbi dhjetë persona janë akuzuar për shembjen e çatisë.
Pasi protestat u masivizuan në të gjithë vendin, Kryeministri Milosh Vuçeviç dha dorëheqjen, çka detyroi partinë e Vuçic të shkojë drejt formimit të një qeverie të re.
Komente
