Parisi dhe Berlini janë të vendosur të mbrojnë sovranitetin e BE-së dhe do të rrisin furnizimet me pajisje të mbrojtjes ajrore për Ukrainën “në dritën e sulmeve masive ruse” ndaj vendit në javët e fundit.
Kjo u njoftua në një deklaratë të përbashkët të publikuar këtë të premte në fund të samitit të Këshillit të Ministrave franko-gjerman në Toulon, në Francën jugore.
Dy liderët Merz dhe Macron folën për afatin dy javor që po skadon pas samitit në Uashington ku Trump mori OK-in e Putin për t’u takuar me Zelenskyn për një marrëveshje paqeje. Kancelari gjerman Merz foli me tone pesimiste sa i takon rezultateve të mira tani afër.
Lufta në Ukrainë mund të zgjasë edhe për disa muaj të tjerë me gjithë angazhimet e udhëhequra së fundmi nga SHBA për t’i dhënë fund asaj.
“Nuk duhet të gënjejmë vetën mbi perspektivën e mbylljes së luftës tani afër, por në nuk do ta braktisim Ukrainën”, tha Merz në krah të Presidentit të Francës.
Shefi i Elizesë ndërkohë risolli në vëmendje edhe një herë afatin e fundit mbi të cilin u krijuan pritshmëritë për një takim Putin-Zelensky, pasi Trump tha pas takimit në Uashington se dy javët në vijim do të tregojnë kush është serioz në përpjekjet për paqen.
Pa një marrëveshje deri të hënë, do të thotë se Putin ka vënë në lojë Donald Trumpin, tha Macron duke iu referuar afatit që Trump vendosi dy javë më parë.
Donald Trump po vazhdon përpjekjet për një takim paqeje mes liderit rus dhe atij ukrainas: këtë e ka deklaruar Shtëpia e Bardhë, pasi presidenti francez Emmanuel Macron paralajmëroi se presidenti amerikan rrezikonte të “tallej” nga Vladimir Putin nëse ky i fundit nuk pranonte takimin së shpejti.
“Presidenti Trump dhe ekipi i tij i sigurisë kombëtare po bashkëpunojnë ende me zyrtarët rusë dhe ukrainas për një takim dypalësh që do t’i japë fund vrasjeve dhe luftës,” tha për AFP një zyrtar i Shtëpisë së Bardhë, i cili foli në kushte anonimiteti.
Me afrimin e fundit të këtij afati Zelensky në një reagim të kësaj të premteje tha se do të kërkojë një reagim të partnerëve perëndimorë në rast se Moska nuk do të japë asnjë sinjal angazhimi për të ndërtuar axhendën e takimit Putin-Zelensky.
Moska këto kohë ka argumentuar se organizimi i takimit merr kohë dhe se ai duhet të ndërtohet në mënyrën më të mirë të mundshme, ndërsa sulmet e ushtrisë ruse nuk janë ndaluar, me qindra drone e raketa të cilat vetëm gjatë javës së fundit kanë shkaktuar dhjetëra viktima nga sulmet në infrastrukturën civile.
Komente
