Frikaseja më e shijshme me pulë, jeshillëqe dhe kërpudha
Përbërësit:
4 racione mish pule
1 lgj mustardë
2 lgj vaj ulliri
1 kokërr qepë
1 thelpi hudhër
200 gr kërpudha
1 lgj gjalpë
2 lgj miell
80 ml verë e bardhë
400 ml ujë
2 qepë të njoma
500 gr jeshillëqe
½ tufë kopër
1 limon (lëng + lëkurë)
Kripë, piper
Përgatitja:
Në një tigan ose tenxhere ngrohim pak vaj ulliri dhe vendosim pjesët e pulës të marinuara me kripë dhe piper. I kaurdisim sa të marrin një ngjyrë të lehtë dhe i largojmë nga tigani. Në po atë yndyrë shtojmë pak gjalpë dhe kaurdisim qepën e thatë të grirë imët, hudhrën dhe kërpudhat të prera në katër pjesë. Vazhdojmë kaurdisjen për 3-4 minuta dhe më pas shtojmë jeshillëqet. Vendosim kapakun dhe sapo volumi i jeshillëqeve të jetë ulur shtojmë pak miell dhe e shuajmë gatimin me verë të bardhë. E lemë për 2-3 minuta sa të avullojë alkooli, shtojmë pjesët e pulës, ujë të ngrohtë dhe qepët e njoma të grira imët së bashku me koperën. E lemë gatimin të ziejë në temperaturë mesatare për rreth 15 minuta. Në fund rregullojmë shijen me kripë, piper, mustardë, lëng dhe cipë limoni të grirë imët.
