Janë dy balete të veçanta që vijnë në një shfaqje të përbashkët në skenën e Teatrit Kombëtar të Operës dhe Baletit nga dy emra të shquar të skenës ndërkombëtare në fushën e baletit, Angelin Preljocaj dhe Erion Kruja. Nën titullin “Frymë”, nata e parë e shfaqjes ka qenë këtë të hënë, për të vijuar edhe këtë të martë dhe të enjten.
Krijuar nga Angelin Preljocaj, një nga koreografët më të njohur bashkëkohorë me origjinë shqiptare, La Stravaganza është një vepër që ndërthur elementet e traditës me ato të modernitetit. Me një koreografi të fuqishme dhe ekspresive, ky balet eksploron kalimin mes epokave, ndikimin e ndryshimeve kulturore dhe përplasjen mes botës së vjetër dhe asaj të re. Një balet, i cili ka një vërshim të së shkuarës në të ardhmen, njësoj sikur koha të ishte një rreth pa mbarim, një përjetësi.
“Për hapjen e sezonit artistik të baletit kemi sjellë dy koreografë shqiptarë që kanë bërë karrierë ndërkombëtare, shumë të suksesshëm: Angjelin Preljocaj, i cili vjen me “La Stravanga” me muzikë të Vivaldit, po dhe me pjesë të tjera muzikore. Është një pjesë shumë argëtuese, me stil neoklasik, që bën bashkë dy botë të ndryshme: SHBA dhe Europën, e tregon se si bashkohen dhe se si puthiten bashkë. Është një balet shumë argëtues, me momente shumë të veçanta.", - thotë Drejtori i Baletit në TKOB, Edi Blloshmi.
Ndërkohë, koreografi Erion Kruja, një tjetër artist shqiptar me karrierë të suksesshme ndërkombëtare, sjell premierë absolute në skenën e TKOBAP-së “Intricate Threads of Humanity”, një vepër që zhytet në thellësitë e sjelljes dhe emocioneve njerëzore.
“Tjetri është Erjon Kruja, një koreograf bashkëkohor, që ka bërë bujë në të gjithë botën dhe vjen me “Intricate Threads of Humanity. Pjesa që sjell është pjesë grupi, që sjell pasion, energji, ku ka këngë, momente ndriçimi të jashtëzakonshëm.”, - vijon Blloshmi.
Këto dy vepra artistike janë një eksplorim i thellë i përvojës njerëzore, ku baleti bëhet gjuha universale që shpreh ndjenjat, kontrastet dhe kompleksitetin e jetës.
Komente
