Nuk është më lajm. Edhe në Gjirokastër, Federata Shqiptare e Futbollit u bë lajm për shkelje në zgjedhjet e shoqatës së Futbollit për delegatët.
Federata tentoi të mbajë zgjedhjet pavarësisht se 7 anëtarë të Shoqatës kishin firmosur një dokument për shtyerjen e Asamblesë zgjedhore pasi zbuluan manipulimet që Federata kishte nisur të bënte duke shtuar ose hequr nga lista anëtarë të shoqatës me të drejtë vote, në interes të personave që Armand Duka i sheh si potencial për t’i marrë votën edhe në garën për president më 2 mars.
Shoqatat Rajonale me statut janë të pavarura, dhe Federata Shqiptare e Futbollit nuk duhet të ndërhyjë, por Armand Duka që e drejton Federatën prej 20 vitesh, përjashtoi Qazim Muhon, që përfaqësonte Luftëtarin, vetëm se ai ishte një nga 7 firmëtarët e shkresës kundër mbajtjes së zgjedhjeve të manipuluara. Në vend të tij, Federata Shqiptare e Futbollit vendosi Altin Çomon, ish-kryetar në bashkinë Libohovë dhe ish kreu i PD-së në Gjirokastër.
Me gjithë tentativën e FSHF-së dhe njerëzit që shkuan për votim, zgjedhjet nuk u mbajtën pasi ambientet e stadiumit “Luftëtari” që do shërbenin për këtë proces, ishin të mbyllura.
“Kemi dakordësuar me bashkinë që mbledhja do mbahet në ambientet e stadiumit, por tani na rezulton se nuk janë vënë në dispozicion,”-u shpreh Arben Dervishi, anëtar i komitetit ekzekutiv të FSHF-së.
Nëse për arsye të ndryshme, si kyçja e stadiumit, zgjedhjet nuk mbahen, Asambleja duhet të mblidhet brenda 24 orëve për të zgjedhur delegatët. Në këto kushte, edhe pse anëtarët janë kundër zgjedhjeve me shkelje në Gjirokastër, Federata njoftoi se ato do të mbahen brenda 24 orëve në ambientet e një hoteli privat, por pa treguar se ku.
Gjatë gjithë janarit federata është kujdesur të manipulojë zgjedhjet në shoqatat rajonale të futbollit me qëllim që Armand Duka të shpallet president për herë të gjashtë i FSHF-së. Në asamblenë zgjedhore për president më 2 mars shoqatat rajonale të futbollit kanë 26 nga 55 votat që janë gjithsej.
Këtë të shtunë në orën 13:00 është vendosur që të thirret asambleja zgjedhore e Shoqatës Rajonale të Gjirokastrës në Futboll, që po tentohet të manipulohet nga FSHF ashtu si në të gjithë rajonet e tjera, ku përshembull në Tiranë dhe Durrës ka përfunduar në gjykatë.
7 nga 8 anëtarët e kësaj shoqate, katër ditë më parë, firmosën një dokument të noterizuar ku kërkojnë të mos zhvillohet asambleja pasi federata nuk u ka vendosur në dispozicion asnjë informacion në lidhje me anëtarët apo kush janë kryetarët që do konkurojnë. Duke pasur frikë për manipulimet ata kanë vendosur në unanimitet që të mos njohin asnjë proces zgedhjor që do kryhet këtë të shtunë.
Gjithsesi zgjedhjet ka të ngjarë që mos të kryhen këtë të shtunë. FSHF pretendon se bashkia e Gjirokastrës ka mbyllur stadiumin ‘Luftëtari’ ku ishte caktuar të zhvilloheshin zgjedhjet. Sipas FSHF-së, bashkia pretendon se nuk ka një njoftim nga federata që sot do të kryheshin zgjedhjet dhe për këtë arsye stadium është mbyllur.
Gjirokastra është shoqata e gjashtë rajonale që kryen zgjedhjet në futboll pas Durrësit, Elbasanit, Tiranës, Fierit dhe Korçës. Në të gjithë rajonet e lartpërmendura ka patur akuza të forta për ndërhyrje të FSHF-së, që ka ndryshuar apo shtuar anëtarët me qëlllimin që të fitojnë të besuarit e tyre.
Kush nga kryetarët dhe delegatët zgjidhet në shoqatat rajonale të futbollit kanë të drejtë vote në asamblenë zgjedhore për president të FSHF-së më 2 mars.
