Një automjet i djegur është gjetur mëngjesin e sotëm në Fushë Krujë. Makina e shkrumbuar tërësisht nga zjarri dyshohet se është përdorur në ngjarje kriminale.
Një nga pistat ku po heton policia është ajo se automjeti mund të jetë përdorur në vrasjen e 28-vjeçarit Mario Majollari mbrëmjen e kaluar në Tiranë.
Ai u qëllua për vdekje me tre plumba nga një automjet në lëvizje. Pas ngjarjes, sipas dëshmitarëve, makina është larguar në drejtim të rrugës së Dajtit ku edhe ka humbur gjurmët.
Njoftimi i policisë:
Informacion paraprak.
Më datë 11.04.2018, Salla Operative Krujë është njoftuar se në fshatin Gramëz, Krujë, është djegur plotësisht nje mjet tip Benz C-Klas, me portbagazh me targa AA 399 DG.
Nga veprimet paraprake hetimore ka rezultuar se më datë 09.04.2018 në Komisariatin e Policisë Lushnje ka bërë kallëzim shtetasi A.T. se i kanë vjedhur mjetin tip Benz me targa AA 399 DG. Në vendngjarje ndodhen Efektivet e Policisë, të cilët po punojnë për sqarimin e rrethanave të ngjarjes.