Futbolli pas vendimit të Gjykatës Europiane të Drejtësisë është futur në kaos dhe duket se do qëndrojë për një periudhë të mirë, pasi projekti si Superliga kërcënojnë jo vetëm UEFA-n dhe FIFA-n, por edhe kompeticione tradicionale si Botërori apo Champions League. Karahas këtyre të fundit, ashtu si La Liga apo Seria A, është rrestuar edhe Federata Shqiptare e Futbollit. Kjo e fundit në një reagim thotë se ‘futbolli është konkurencë e hapur dhe gjithëpërfshirës’, duke nënkuptuar parimet që mundohet të përhapë UEFA dhe FIFA.
“FSHF pasi është njohur me vendimin e Gjykatës Evropianë të Drejtësisë të dhënë ndaj çështjes se “Super Ligës Europiane”, shpreh qëndrimin e saj të palëkundur se ky vendim në thelbin e tij nuk autorizon apo lejon formimin e një Super Lige Evropiane, por përbën një orientim për UEFA dhe FIFA për instalimin e politikave dhe vendosjen e qartë të kritereve në administrimin e sistemit të autorizimit të kompeticioneve futbollistike, të cilat duhet të jenë në konformitet të plotë me parimet e ligjit të BE-së mbi konkurrencën.
Ajo çfarë vendimi i Gjykatës Europiane të Drejtësisë ka përcaktuar sot, janë në reflektim dhe në thelbin e përpjekjeve e këtyre dy viteve të fundit të UEFA-s dhe FIFA për të harmonizuar pikërisht sistemin e këtyre kritereve me ligjin e BE-së dhe besojmë se tashmë jemi në rrugën e duhur në përputhje me qasjen e këtij vendimi.
FSHF qëndron krah për krah UEFA-s, FIFA-s, ECA-s, FIFPro, Ligave Europiane apo edhe qeverive e institucioneve qeveritare europiane dhe përpjekjeve të tyre të pandalshme për zhvillimin e futbollit në mënyrë progresive, bazuar në parimet e konkurrencës së hapur, gjithëpërfshirës, meritokracisë sportive dhe solidaritetit të vërtetë,”shkruan FSHF.
