Policia e Lezhës në bashkëpunim me atë të Burgjeve kanë arrestuar tre persona, të cilët me anë të dronit tentuan të fusnin drogë e celularë brenda në ambientet e burgut të Shënkollit. Të arrestuarit janë; M.V. 28 vjeç banues në fshatin Vrake, Malësi e Madhe, i dënuar më parë për vjedhje, Xh. K. 25 vjeç dhe Xh.L .28 vjeç, banues në Bajze, Malësi e Madhe.
Gjatë orëve të vona të mbrëmjes së djeshme, në rrethimin e jashtëm të burgut, punonjësit e Policisë së burgut që kryenin shërbim kanë konstatuar se po fluturonte një dron duke hyrë në zonën e ndaluar dhe menjëherë kanë njoftuar Policinë e Lezhës, e ndërsa në mbështetje të tyre shkuan edhe FNSH e Shkodrës.
Pas bllokimit të dronit, policia gjeti të lidhura në një qese plasmasi 7 pako me lëndë narkotike si dhe tre telefona celularë me tre karta. Gjithashtu policia bllokoi edhe automjetin e autorëve, ku u gjet edhe telekomanda e dronit. Ndërsa brenda rrethimit të dytë të jashtëm të burgut, u gjet edhe çanta ku tre të arrestuarit kishin futur dronin, si dhe tre aparate të tjerë celularë.
Komente
