TIRANË- Në Policinë e Tiranës Idris Daullja është zëvendësdrejtor për rendin dhe sigurinë, por për Kryekomisarin e uniformave blu në kryeqytet pozicioni si shef në një prej komisariateve të vendit do të ishte vendi ku do të shërbente më mirë.
Gatishmëria e tij për të marrë një detyrë më të ulët brenda radhave të policisë duket se është shpërblyer, pasi Idris Daulle u rendit i pari mes 42 kandidatësh për shefa të 6 komisariateve me drejtues vakant, duke grumbulluar 74 pikë në total.
Aktualisht, Drejtoria e Përgjithshme e Policisë së Shtetit përfundoi procesin e vlerësimit, ku u përzgjodhën 17 kandidatë që kaluan pragun minimal të pikëzimit prej 70 pikësh, duke hyrë në listën përfundimtare të emërimit të mundshëm, në një nga postet për Komisariatin nr. 2 në Tiranë, Rinas, Himarë, Cërrik, Komisariatin e Kufirit Dibër apo Komisariatin e Kufirit Sarandë.
I dyti në renditje, pas Daulles, është Përparim Dema, aktualisht shef i Komisariatit të Rinasit, me 73 pikë në total. Kjo është hera e parë që pozicioni i shefit të Rinasit zgjidhet me konkurrim të hapur, pasi gara për këtë post në fund të vitit të kaluar ku u zgjodhën me konkurs të gjithë shefat e rinj nuk u hap.
Mes emrave të përzgjedhur që kalojnë pragun mbi 70 pikë bien në sy edhe ish-shefa komisariatesh si Oltion Agolli dhe Bledar Rreshka, apo shefi i krimeve në Komisariatin nr. 2, Ermal Kenaçi. Në listë ndodhet e vetmja grua që mori pjesë në këtë proces, Ediona Dano, aktualisht shefe e seksionit për parandalimin e dhunës në familje dhe mbrojtjen e të miturve në Policinë e Tiranës.
Pas shpalljes së pikëve, kandidatët kanë në dispozicion 5 ditë për të paraqitur ankesa apo kërkesa për rishqyrtim të vlerësimeve. Pas kësaj faze, i takon Drejtorit të Përgjithshëm të Policisë së Shtetit, Ilir Proda, të emërojë 6 shefat e rinj të komisariateve nga lista me 17 emrat e përzgjedhur. Kryepolici ka të drejtë të emërojë qoftë edhe të 17-in të renditur, nëse e sheh të arsyeshme.
Komente
