TIRANË- Kreu i grupit parlamentar të Partisë Demokratike, Gazment Bardhi ka reaguar pas vizitës së kryeministrit Edi Rama i cili deklaroi se Hungaria është model për Shqipërinë. Bardhi shkruan se modeli i vërtetë i Viktor Orbanit është ai i kontrollit ndaj medias dhe i korrupsionit.
Sipas Bardhit, Rama është kampion jo vetëm në Europë, por edhe në botë i kufizimit të lirisë.
“Edi Rama ia thotë në sy Orbanit: Hungaria është model për ne”- ky ishte mesazhi kyç që mediat transmetuan dje nga vizita e Kryeministrit Rama në vendin mik. E vërteta është që modeli i Kryeministrit Orban në Hungari nuk mund të jetë kurrë modeli ynë i rrugëtimit evropian. Për grupin më të madh në Parlamentin Europian EPP modeli i Kryeministrit Orban është ai i kontrollit ndaj medias që ka cenuar lirinë e shprehjes dhe që ka sjell perceptimin për rritjen e korrupsionit.
Në këtë drejtim, Edi Rama është kampion jo vetëm në Europë, por edhe në Botë. Prandaj edhe Edi Rama duket të jetë shembulli dhe modeli i Kryeministrit Orban dhe jo anasjelltas”, shkruan Bardhi.
Bardhi nënvizon më tej se modeli i Shqipërisë për integrimin në Bashkimin Evropian nuk mund të jetë Hungaria. Ai shton se problemi në Shqipëri është Edi Rama, ndërsa shqiptarët kanë në dorën zgjidhjen që është largimi i tij.
“Duke mbështetur fuqimisht procesin e integrimit europian të Shqipërisë, ritheksoj se model i Shqipërisë në këtë proces nuk mund të jetë kurrë Hungaria, edhe pse një vend mik. Modele në këtë proces nuk duhet te jenë PROBLEMI, por ZGJIDHJA.
Ne në Shqipëri ka kohë që e kemi indentifikuar PROBLEMIN e procesit të integrimit dhe quhet EDI RAMA. ZGJIDHJEN e kanë shqiptarët e ndershëm në dorë: LARGIMI një orë e më pari të problemit (EDI RAMËS)!”, nënvizon Bardhi.
