Legjenda e muzikës italiane dhe kinemasë, Gianni Morandi, ka zgjedhur bregdetin e jugut të Shqipërisë për të pushuar.
Ai ka qenë mysafir i bregdetit të Dhërmiut në Himarë, ku është takuar edhe nga kryebashkiaku Vangjel Tavo. I zgjedhuri vendor ka ndarë një video në rrjetin social Facebook dhe një postim nga ky takim, ku shpreh kënaqësinë dhe mikpritjen shqiptare.
“Kënaqësi e madhe që një ikonë e muzikës italiane si Gianni Morandi, të zgjedhë Dhërmiun për të pushuar. Pata nderin të kem një takim miqësor dhe shumë emocionues me këngëtarin i cili me muzikën e tij, ka bërë epokë dhe ka kultivuar edhe disa breza shqiptarësh, që nga vitet 60-të. Mirënjohje Gianni Morandi që zgjodhe Jugun e Shqipërisë!”, shprehet krhyebashkiaku Tavo.
Teksa shpjegon se bregdeti shqiptar vizitohet nga shumë turistë italianë, Tavo flet edhe për vlerat e turizmit dhe të artit që lidhin dy vendet.
Edhe këngëtari i njohur Morandi shprehet se është i kënaqur që viziton Shqipërinë dhe bregdetin e jugut, duke nënvizuar se:
“Italinë dhe Shqipërinë i lidhin miqësi të forta, sikurse ato të artit dhe muzikore. Shqiptarët janë shumë të apasionuar pas muzikës dhe kanë dëgjuar shumë këngë italiane në vitet 60-80. Shumë miq të mi italianë vijnë me pushime këtu. Një mik i imi inxhinier nga Bolonja më tha: Shko me pushime në Shqipëri, sepse është vend fantastik! Këtu ku qëndrojmë është shumë bukur, kemi malin dhe detin, jemi përballë njëri-tjetrit. E dëgjova dhe erdha, bashkëshortja ime është shumë e lumtur. Besoj se do rikthehem edhe herë të tjera, siç do e bëjnë edhe shumë italianë”.
Morandi mbërriti fillimisht në Tiranë, ku qëndroi një ditë, dhe më pas, i sugjeruar edhe nga miqtë e tij, shkoi në Palasë ku kaloi dy ditë. Më tej ai udhëtoi drejt Himarës dhe Dhërmiut, ku pati edhe një takim me kryetarin e Bashkisë së Himarës, Vangjel Tavo. Ky i fundit shprehu kënaqësinë për takimin me artistin e njohur italian.
Vetë Gianni Morandi ka treguar se vizita e tij në Shqipëri erdhi pas sugjerimeve të miqve, të cilët i kishin folur për bukuritë e jugut të vendit. Ndërkohë sot, të shtunën, ai po pushon në Sarandë, ndërsa nesër pritet të përfundojë pushimet dhe të largohet nga Shqipëria.
Komente
Me se e vertete,kengetar i madh e me shpirt te madh,me ze te shkelqyer e kenge te famshme.Kam pare nje dokumentar te shkelqyer per Moriconen dhe tregohej aty edhe per kenget e famshme qe i kompozoi e u bene pjese filmi ku interpretonte Morandi si aktor,por dhe i interpretonte ato kenge ne film.Cuditerisht Moricone nuk i pelqente ato kenge qe i kishte kompozuar vete,por publiku eshte kritiku e vleresuesi me i mire dhe ato kenge sot jane pjese e kengeve me te bukuara italiane.
PërgjigjuKénaqsi kur dëgjon pér Xhani Morandi, një këngëtar i madh po dhe njeri i mirë. Në fillimet e veta Ka bashképunuar me Enrio Moricone.
Përgjigju