Për 3 ditë me radhë, nga 9 deri më 11 maji, Shqipëria do të jetë kryeqendra botërore e çiklizmit, me hapjen e madhe të ‘Giro D’Italias’. 3 garat që prekin qytete si Durrësi, Tirana, Elbasani dhe Vlora do të ndiqen nga një publik që shkon deri në 800 milionë teleshikues.
“Është promovim për Shqipërinë, për turizmin por gjithashtu edhe për brezat e rinj në Shqipëri për të marrë njohuri për çiklizmin. Për të marrë dijeni për këtë sport, apo se si bëhet ai, sepse sinqerisht çiklizmi në Shqipëri nuk ekziston,”-u shpreh çiklisti Ylber Sefa.
Për Report TV Ylber Sefa, ish-çiklist i ekipit kombëtar i cili garon dhe stërvitet në Belgjikë, tregon se cilat janë kriteret për të qenë pjesë e “Giro D’Italia.”
“Duhet të kesh një ekip me mbi 20 çiklistë. Ekipi duhet të jetë i rregjistruar në federatën botërore të çiklizmit, por ekipi duhet të ketë minimum 10 milionë euro buxhet. Jo vetëm kaq, por sportistët duhet të kenë edhe pikë në federatën botërore. Pra të kenë fituar disa gara,”-tha ai.
Vetë Sefa, edhe pse fitues i 11 garave kombëtare por edhe 2 rretheve çiklistike, është i përjashtuar përjetë nga ekipi kombëtar prej dhjetorit 2023 pasi akuzohet se ka bërë akuza të padrejta për drejtuesit e federatës shqiptare të çiklizmit në lidhje me ndershmërinë e garave.
“Federata është mbushur me pijanecë. Rrinë pinë raki gjithë ditën dhe nuk shohin të përmirësojnë sportin. Unë jam gati t’i kthehem ekipin kombëtar, por nëse gjërat bëhet me seriozitet dhe jo shqiptarçe,”-deklaroi ai.
Prej vitit 1999 Federata Shqiptare e Çiklizmit drejtohet nga ish-çiklisti Skënder Anxhaku.
Komente
