Autoritetet italiane kanë konfirmuar se kanë gjetur pikturën "Portreti i Zonjës" i Gustav Klimt, e vlerësuar 60 milionë euro, e cila u grabit 22 vite më parë në një galeri arti në Piacenza.
Sipas autoriteteve, piktura u gjet rastësisht gjatë punimeve në të njëjtën galeri "Ricci Oddi" në Piacenza ku u zhduk më shkurt të 1997.
Vepra e artit u gjet brenda një thesi të zi në murin e jashtëm të galerisë, e fshehur në një zgavër dhe e mbuluar nga bimët.
Mendohet se grabitësit e kanë fshehur fillimisht aty për ta rekuperuar pak ditë më vonë, por nuk kanë mundur.
"Portreti i Zonjës" iu nënshtrua një analize nga ekspertët e artit të cilët vërtetuan origjinalitetin e saj.
Piktura është realizuar nga Klimt në periudhën kohore 1916-1917. Ajo ka përmasat 60x55cm.
Piktori austriak Gustav Klmit konsiderohet një nga artistët më përfaqësues të rrymës Art Nouveau të fund viteve të '800 e fillim të '900.
Komente
