Bozhidar Delic, një gjeneral në pension i Ushtrisë Jugosllave i cili ishte komandant i Brigadës 549 të Motorizuar, e cila ishte përfshirë në disa nga sulmet më famëkeqe në fshatrat në Kosovë në vitin 1999, u zgjodh si një nga shtatë nënkryetarët e parlamentit serb të martën vonë mbrëma.
Deliç u propozua për postin si kandidat i koalicionit të opozitës së krahut të djathtë NADA (Shpresa). Ai është një nga tre nënkryetarët e opozitës dhe u zgjodh me 197 vota, ku përfshiheshin vota nga partitë në pushtet dhe opozita. OJQ-ja Fondi për të Drejtën Humanitare publikoi një dosje në vitin 2013 që përmban dokumentacionin më të plotë deri më tani të tetë ofensivave ushtarake që përfshinin Brigadën 549 të Ushtrisë Jugosllave në fshatrat e Kosovës në mars dhe prill 1999, të cilat rezultuan në gjithsej 885 të vdekur.
Në një sulm në fshatrat Mejë dhe Korenicë më 27 prill 1999, trupat, policia dhe paraushtarakët, përfshirë ushtarë të Brigadës 549, vranë të paktën 377 civilë, 36 prej të cilëve ishin nën 18 vjeç.Zyra e prokurorisë serbe për krimet e luftës në vitin 2013 tha se Delic ka qenë nën hetim më shumë se një herë. Ai nuk u padit kurrë. Ai asnjëherë nuk e ka mohuar të jetë komandant i Brigadës 549, por ka mohuar të ketë kryer krime lufte.
“Unë e di se çfarë po ndodhte në zonën time të përgjegjësisë. Unë kam qenë gjithmonë në vijën e parë të sulmit,” tha Delic në Gjykatën Penale Ndërkombëtare për ish-Jugosllavinë, duke pretenduar megjithatë se ai “nuk kishte njohuri për vrasjet masive të shqiptarëve”.
Duke folur për një sulm tjetër të Ushtrisë Jugosllave në fshatin Landovicë më 26 mars 1999, Delic i tha Komisionit Serb për Bashkëpunim me ICTY se sulmi ishte nisur si përgjigje ndaj vrasjes së ushtarëve të tij nga Ushtria Çlirimtare e Kosovës.
"Unë urdhërova angazhimin e një skuadroni të tërë ushtrie... dhe urdhërova majorin Nikolic të dërgonte një tank," shkroi Deliç në një deklaratë drejtuar komisionit , duke shpjeguar se fshati ishte një bazë për "terroristët".
Delic doli në pension në 2005 dhe më vonë u bë anëtar i Partisë Radikale Serbe nacionaliste. Kur Tomislav Nikoliç dhe Aleksandar Vuçiç, të cilët të dy më vonë do të shërbenin si president i Serbisë, u larguan nga Partia Radikale dhe krijuan Partinë Progresive Serbe, Delic ishte një nga njerëzit që iu bashkua atyre.
Megjithatë, ai u largua nga Partia Progresive në 2011 dhe u kthye në Partinë Radikale, por më pas u largua përsëri në 2020. Ai ka qenë deputet serb disa herë që nga viti 2007 dhe dy herë ka shërbyer si nënkryetar parlamentar. Ndërsa ishte në detyrë, Presidenti Slobodan Millosheviç nderoi Brigadën 549 për rolin e saj në luftën në Kosovë, duke i dhënë brigadës medaljen Hero i Popullit për “mbrojtjen heroike të vendit”.
