Mbetjet e ujësjellësit të famshëm të Kalasë së Gjirokastrës, i cili nëpërmjet urave të gurta sillte ujin nga mali i Sopotit për të furnizuar kështjellën, tërheqin kërshërinë e vizitorëve të ndryshëm që mbërrijnë këto ditë në qytet.
Nga ujësjellësi i dikurshëm i ndërtuar i gjithë me ura dhe harqet të gurta, ka ngelur një urë e gurtë në pjesën e sipërme të lagjes Dunavat, si dhe disa fragmenete muresh dhe harqesh në zona të ndryshme të pjesës veriore të kalasë.
Por rrugëtimi i turistëve për te mbërritur në këtë destinacion të veçantë turistik, ishte sfidë dhe njëherazi rraskapitëse për shkak të amortizimit total të rruges. Banorët e lagjes Dunavat, kanë pritur tre dekada mos më shumë, që të investohej në këtë segment.
Kam 30 vjet që kam ardhur këtu, rruga ishte e papërfunduar. Rruga ishte e pa kaluesshme, turistët ktheheshin nga rruga sepse nuk mund të kalonin, kishte vetëm gurë. Tani u bë një rrugë shumë e mirë me kalldrëm që nuk është bërë as në qytet brenda.
Banorët
Për kryebashkiaken e Gjirokastrës Zamira Rami, në fund të katër muajve, do të përfundojë rikonstruksioni i gjithë segmentit, pasi interesi dhe kërkesat, jo vetëm nga banorët por edhe turistët, ka qenë i lartë për të vizituar monumentin e veçantë ndërtuar në 1812-1813.
Ne sjellim me këtë investim dy të mira, një infrastrukturë komode për qytetarët, duke respektuar kondicionet e arkitekturës me kalldrëm, si dhe njëkohësisht një shteg turistik në funksion të turizmit.
Zamira Rami, kryetare e Bashkisë Gjirokastër
Ujësjellësi i gurtë i Kalasë së Gjirokastrës, përbën një ndër ndërtimet më të veçanta për kohën e vet. Ai ështe i gjatë 12 km dhe nëpërmjet një arkitekturë të veçantë me ura dhe harqe, sillte ujë nga mali i Sopotit për të furnizuar kështjellën e Gjirokastrës. Me kthimin në identitet të rrugës, i cili përfshin edhe ndriçimin publik, synohet promovimi i një tjetër aseti turistik për Gjirokastrën.
Komente
