Shija e presidentit amerikan për stilin barok ka mbërritur edhe në zyrën e Shtëpisë së Bardhë. Në planet e tij përfshihet edhe shndërrimi i Kopshtit të Trëndafilave në një patio ( oborr ku mund të presë vizitorë apo të zhvillojë takime)
Që Trump nuk ishte një tip i përmbajtur, kjo u kuptua që në fillim. Asgjë rreth tij nuk kalon pa u vënë re: flokët ngjyrë kashte dhe nxirja e tij që anon nga një portokalli i ndezur e përforcojnë dëshirën e tij për të rënë në sy. Përveç pamjes së jashtme, ai kurrë nuk e ka fshehur dashurinë për ekstravagancën edhe në hapësirat e tij private. Rezidenca e tij në Mar-a-Lago është një kombinimi i arit dhe objekteve të çdo lloji, nga statujat te fotografitë e familjes me korniza të zbukuruara.
Tani, shija e tij për stilin barok ka hyrë edhe në Zyrën Ovale. Madje edhe telekomanda është e mbështjellë me ar. Në një video të publikuar nga zv/shefi i stafit të Shtëpisë së Bardhë, Dan Scavino, shihen muret pothuajse të mbuluara plotësisht me piktura – gjithsej 20 – që paraqesin figura historike nga të cilat Trump ka thënë se merr frymëzim. Mes tyre janë ish-presidentët Ronald Reagan, Thomas Jefferson, Benjamin Franklin, Abraham Lincoln, Andreë Jackson dhe Franklin D. Roosevelt, të cilët, po të ishin të gjallë, do të duhej të "bëheshin me bërryla" për të fituar edhe një centimetër hapësirë në mur. Kornizat e tyre pothuajse prekin njëra-tjetrën.
Foto: Mbajtëse letrash prej ari me mbiemrin 'Trump' në zyrën Ovale
Një stil tërësisht ndryshe nga Biden, i cili kishte të varur në mur vetëm gjashtë piktura. Ndryshe dhe nga Obama, që kishte zgjedhur vetëm dy portrete, duke lënë vend për art bashkëkohor, si dy vepra të Edward Hopper të huazuara nga Muzeu Whitney.
Ndryshe nga paraardhësit e tij, Trump dëshiron të imponojë një stil më pranë një monarku sesa një presidenti të zgjedhur. Që në hyrjen e tij të parë në Shtëpinë e Bardhë më 2016, ai e bëri të qartë shijen e tij luksoze duke shpenzuar 1.75 milionë dollarë për të rinovuar Zyrën Ovale dhe disa dhoma të tjera të krahut perëndimor – shumë më tepër se 100 mijë dollarët që i akordohen çdo presidenti për arredimin sipas dëshirës së tij.
Foto: Zyra Ovale e Donald Trump
Por kjo nuk është e gjitha. Pas rinovimit kontrovers të Kopshtit të Trëndafilave nga zonja e parë Melania, tani vetë Trump ka në plan një tjetër ndryshim të madh: shndërrimin e hapësirës historike të gjelbër në një patio (oborr) ku të presë liderët ndërkombëtarë – sikur Shtëpia e Bardhë me 5 mijë metra katrorë të mos kishte tashmë hapësira të mjaftueshme për këtë qëllim.
Për Trumpin, klima dhe natyra nuk duket se janë përparësi. Ashtu si një monark, ai po e kthen Zyrën Ovale në një skenë për të ekspozuar veten dhe trofetë e tij. Mbi Resolute Desk, ai ka vendosur një mbajtëse letrash prej ari me mbiemrin e tij të gdhendur me shkronja të mëdha. Pas tavolinës, ai ka shtuar një tryezë me një kopje të trofeut të Kupës së Botës FIFA – një detaj jo i rastësishëm, duke qenë se kampionati i vitit 2026 do të mbahet në Amerikën e Veriut, me shumicën e ndeshjeve të luajtura pikërisht në Shtetet e Bashkuara. /Corriere della Sera/
Komente
