Gjykata e Posaçme pushoi padinë për shpifje të bërë nga ish-kryetari i Partisë Demokratike, Lulzim Basha ndaj kryebashkiakut të Tiranës, Erion Veliaj. Togat e zeza pushuan çështjen pasi nuk është paraqitur në gjyq as Lulzim Basha dhe as avokatet e tij.
Basha paditi Veliajn për shpifje, për akuzat publike të kryebashkiakut se ish-kryedemokrati u bë me 4 shtëpi gjatë tërmetit dhe pandemisë, duke përfituar gjatë periudhës së fatkeqësisë, dhe se ka ndërtuar kate pa leje. Por, pavarësisht se kërkoi dënimin e Veliajt për shpifje, Basha nuk u paraqit asnjëherë në gjyq.
Në tetor të vitit 2020 PD paditi Velian në Gjykatën e Tiranës, duke argumentuar se Veliaj, si drejtues i fushatës së PS për Tiranën, ka bërë 3 akuza konkrete, që lidhen me pasurinë e Bashës, akuza të cilat sipas PD janë bërë me qëllim që t’i dëmtojnë imazhin kryedemokratit.
Çështja shkoi në GJKKO pas vendimit të marrë nga Gjykata e Lartë pas përplasjes për 'kompetencë lëndore' të GJKKO dhe Gjykatës së Tiranës se cili prej institucioneve e ka në kompetencë gjykimin e akuzës për shpifje të bërë në drejtim të kryetarit të Bashkisë Tiranë, Erion Veliajt nga Lulzim Basha, kryetar i PD-së.
