Një vendim i GJKKO-së së shkallës së parë, i marrë më 28 shkurt dhe i zbardhur së fundmi, urdhëroi Prokurorinë e Posaçme SPAK të regjistrojë një procedim penal ndaj deputetes socialiste Olta Xhaçka dhe bashkëshortit të saj Artan Gaçi, investitor strategjik, mbi dyshimet për “Shpërdorim të detyrës”, “Falsifikim të dokumenteve” dhe pastrim parash, të kryera në bashkëpunim.
Vendimi erdhi pasi më herët, prokurori i Posaçëm, Olsi Dado, nuk kishte regjistruar procedimin “në mungesë të elementëve të veprës penale”. Por ish kandidati për kryebashkiak i Himarës, Fredi Beleri, i dënuar për blerje votash, kundërshtoi në gjykatë, pozicionin e prokurorit. Kishte qenë vetë Beleri, ai që e kishte hapur këtë çështje nga burgu, shtatorin e vitit 2023, kur Olta Xhaçka mbante ende pozicionin e ministres së Jashtme. Fredi Beleri i cili ishte arrestuar disa muaj më herët, majin e vitit 2023, bëri padinë ndaj zyrtares socialiste edhe si shenjë hakmarrje ndaj prangosjes së tij, pasi Xhaçka si kryediplomate pati përplasjet më të forta me Greqinë për Belerin së bashku me Kryeministrin Rama.
Bashkë me Xhaçkën dhe Artan Gaçin, Beleri paditi edhe kryebashkiakun e atëhershëm të Bashkisë së Himarës, Jorgo Goro, për të cilin SPAK vijoi hetimet dhe e dërgoi çështjen në GJKKO bashkë me zyrtarë të tjerë, ku Goro u dënua për shpërdorim detyre dhe fshehje pasurie me 3 vite e 1 muaj burgim.
Çështja ka të bëjë me tjetërsimin e dy parcelave toke në Himarë, rreth 10 mijë metra katrorë, që më pas u blenë nga Artan Gaçi për investimin e tij strategjik, për ndërtimin e një kompleksi turistik në Himarë, me vlerë 5.5 milionë euro. Gjykata gjeti fajtor Goron pasi sipas saj përcolli pranë organeve kompetente dokumente të falsifikuara duke bërë të mundur regjistrimin e një toke bujqësore pronë shtet, në favor të Stavri Mëhillit, në kërkim. Pas kësaj procedure, toka u shit te një shoqëri private me përfaqësues ish-deputetin Artan Gaçin. Aktualisht sipërfaqja e tokës është e konfiskuar me vendim të GJKKO të shkallës së parë,
Në vendimin që i kërkon SPAK-ut regjistrimin e procedimit penal ndaj Xhaçkës dhe Gaçit, gjyqtarja Flora Hajredinaj thotë se është e rëndësishme që të sqarohet roli i tyre. Beleri ka ngritur dyshime se bashkëshorti i Xhaçkës, Gaçi ka ndikuar tek regjistrimi në Kadastrën e Vlorës. Për gjyqtaren Hajredinaj argumenti i SPAK se “fakti penal nuk ekziston” mund të përmendet vetëm pasi janë bërë verifikimet përkatëse. Ndërkohë që duhet nënvizuar se ish deputeti i Partisë Socialiste, Artan Gaçi, është marrë në pyetje nga SPAK për këtë çështje tetorin e vitit 2023, vetëm pak javë pas padisë së Belerit. Megjithatë SPAK tashmë është i detyruar të regjistrojë procedimin penal, e më pas të dalë në një përfundim, nëse do të gjejë apo jo vepër penale.
Më herët çështja e investimit të Artan Gaçit si investitor strategjik dhe përfshirja e bashkëshortes së tij ministre u bë pjesë e një debati të fortë politik që shkoi disa herë në Gjykatën Kushtetuese. Verën e vitit 2022, demokratët kërkuan dërgimin e mandatit të Xhaçkës në Kushtetuese pasi tyre bashkëshorti i saj kishte përfituar fonde publike, duke shkelur nenin 70/ pika 3 e Kushtetutës. Kjo kërkesë nisi një “odise” të vërtetë, me refuzim 3 herë të socialistëve për ta dërguar në Gjykatë mandatin, ndërsa në 2 vendime Kushtetuesja urdhëroi që të ishte ajo që ta shqyrtonte. Çështja përfundoi në Komisionin e Venecias i cili 10 dhjetorin e 2024-s doli me një opinion që i ndau më shumë palët. Sipas Venecias Parlamenti nuk është i detyruar të votojë në një mënyrë të caktuar, por vendimet e Gjykatës Kushtetuese duhet që të zbatohen. Kjo terminologji teknike bëri që të dyja palët ta shikonin si triumf të tyre.
Komente
