MILANO, Itali - Interi 'shkërmoqi' 5-0 Torinon në raundin e parë të Serie A. Mbrëmja e të hënës ishte e duhura për zikaltërit e Cristian Chivu, që treguan lojë të mirë përpara tifozëve të tyre.
Sfida u zhbllokua në minutën e 18-të nga Bastoni, i cili përfitoi nga pasimi final i Barellas dhe kaloi Interin në avantazh. Kaq u desh që vendasit mos mbaheshin më dhe Susic në minutën e 36-të bëri një pasim të bukur për Thuram, aty ku sulmuesi francez nuk mund të gabonte përballë Israel.
Fraksioni i dytë solli një gabim në prapavijën e Torinos dhe kapiteni Lautaro Martinez përfitoi për të 'qëndisur' golin e tretë. 'Festivalin' e golave e vijoi Thuram me dopietën personale dhe golin e katërt në minutën e 62. Blerja e verës, Bonny mori vendin e Thuram dhe vetëm me pesë minuta në fushë ia doli të shënonte në debutimin zyrtar, për të 'vulosur' shifrat në 5-0.
Një sukses i merituar për Interin, por një kambanë alarmi për Torinon. Trajneri Marco Baroni duket se ka punë për të bërë te miqtë, ndërsa një kontribut pritet të japin edhe dy futbollistët e Kombëtares, Ismajli dhe Asllani, që në këtë duel munguan për shkak të lëndimit dhe mungesës së dokumentacionit.
Komente
