Bundesliga gjermane e futbollit është në raundin e 21-të. Të premte Bayern Munich fitoi 3-0 kundër Werder Bremen dhe vijon të mbetet i qetë në krye të klasifikimit.
Pjesa e parë e ndeshjes nuk ishte e thjeshtë për bavarezët, me miqtë që u mbrojtën mirë dhe shkuan në dhomat e zhveshjes me rezultatin e bardhë. Në fraksionin e dytë ishte një prekje e topit me dorë në zonë që bëri arbitrin të akordonte 11 metërsh për vendasit. Harry Kane u tregua i saktë dhe i dha epërsinë të besuarve të Kompany.
Goli çliroi bavarezët që shënuan edhe të dytin me Sane, i cili nuk mund të gabonte pas pasimit të Laimer. Në shtesën e shtatë kishte sërish vend për një tjetër penallti dhe Kane siguroi dopietën personale.
Tanimë pas 21 ndeshjeve të luajtura Bayern Munich e gjen veten në krye të Bundesligës me 54 pikë dhe vetëm një humbje, ndjekur nga Leverkusen me 45 pikë dhe një ndeshje më pak.
Nga ana tjetër Bremen me 30 pikë merr humbjen e shtatë këtë sezon dhe mbetet në pozitën e tetë.
Komente
