Serie A e futbollit në Itali mbylli të hënën raundin e 35-të. Në "Luigi Ferraris" vendasit e Genoas u përmbysën 1-2 nga Milani. Kjo është ndeshja e gjashtë e kuqezinjve që me Conceiçaon në stol ia dalin të kthejnë rezultatin, ose thënë ndryshe +16 pikë në klasifikim.
Milani e sheh veten me tre fitore radhazi, dy në kampionat dhe një në Kupën e Italisë, ku eliminoi Interin. Me vetëm shtatë ditë larg nga finalja e Kupës kundër Bolognas, tri pikët në udhëtim janë një bonus i madh moral për djemtë e Conceiçao që duket se nuk do e arrijnë objektivin Evropë, pasi janë gjashtë pikë larg.
NDESHJA - Pjesa e parë u mbyll pa gola, ndërsa në minutën e 61-të Vitinha befasoi Milanin dhe dërgoi tifozët vendas në festë me golin e tij. Pas këtij momenti Milani 'u zgjua' dhe paçka rebeshit në 'Marasi' ishte Leao që barazoi pas asistit të Gimenez në minutën e 76-të. Festa do ishte dyfishe për kuqezinjtë, që vetëm një minutë më vonë shënuan edhe golin e tri pikëve. Leao bëri që Frendrup ta dërgonte topin në rrjetën e tij duke i dhënë një sukses të merituar ekipit nga Milano.
RENDITJA - Me 57 pikë Milani mban pozitën e nëntë në renditje, gjashtë pikë pas Lazios që për momentin ndodhet në vendin e gjashtë dhe merr një biletë për në Conference League. Genoa me 39 pikë e ka siguruar mbijetesën dhe tre raunde nga fundi i sezonit e sheh veten në vendin e 13-të.
Ndërkohë Napoli me 77 pikë kryeson renditjen, ndjekur nga Interi me 74, Atalanta me 68-të dhe Juventusi, Roma e Lazio me 63 pikë. Ndërkohë matematikisht Napoli dhe Interi kanë siguruar një biletë për në Champions League sezonin e ri.
Ndeshjet ku Milani ka marrë pikë duke kthyer rezultatin me Conceiçaon në stol:
Serie A
1. Como-Milan nga 1-0 në 1-2 (+3)
2. Milan-Parma nga 1-2 në 3-2 (+6)
3. Leçe-Milan nga 2-0 në 2-3 (+9)
4. Milan-Como nga 0-1 në 2-1 (+12)
5. Milan-Fiorentina nga 0-2 në 2-2 (+13)
6. Genoa-Milan nga 1-0 në 1-2 (+16)
Superkupa e Italisë
7. Juve-Milan nga 1-0 në 1-2
8. Inter-Milan nga 2-0 në 2-3
Komente
