Është grabitur me armë zjarri kallashnikov zyra e Postës Shqiptare në Gjirokastër dhe autori është arrestuar brenda pak minutave. Ngjarja ka ndodhur para 10 minutash kur Ilir Mata, 29-vjeç nga Vlora, nën kërcënimin e armës së zjarrit dhe i maskuar, hyri në zyrën e Postës Shqiptare në Pazarin Karakteristik dhe grabiti rreth 300 mijë lekë.
Burime për Report Tv bëjnë me dije 29-vjeçari ka tërhequr një sasi të padeklaruara të hollash tek sporteli ku ndahen pensionet. Pasi ka tërhequr të hollat, 29-vjeçari nga Vlora, emigrant në Greqi, është larguar me shpjetësi.
Por policia u vu në lëvizje dhe e prangosi të riun vetëm pak minuta më vonë, në zonën e ish Poliklinikës, në lagjen Meçite dhe e ka shoqëruar direkt në Komisariatin e Policisë.
'Rreth orës 12:52, një shtetas, i maskuar dhe nën kërcënimin e armës së zjarrit, ka arritur të marrë një shumë parash, në filialin e Postës Shqiptare në lagjen "Varrosh", Gjirokastër, dhe është larguar me shpejtësi në rrugicat e lagjes Varosh. Më marrjen e njofitmit, shërbimet e Policisë kanë rrethuar zonën dhe janë vënë në ndjekje të autorit. Falë kontrollit të imtësishëm të zonës, shërbimet e Policisë bënë të mundur që pas disa minutash të lokalizonin dhe të arrestonin autorin e dyshuar të ngjarjes, shtetasin I. M., 29 vjeç, banues në Vlorë, si dhe të sekuestronin armën e zjarrit, shumën e parave të vjedhura, kapuçin dhe një palë doreza. Gjatë kontrollit në banesën e tij, Policia ka gjetur dhe sekuestruar edhe një sasi municioni luftarak. 29-vjeçari është shoqëruar në ambientet e Komisariatit të Policisë Gjirokastër, për të vijuar me procedurat e mëtejshme.'- njofton policia.
Komente
