5 vite nga megagrabitja e 4.6 milion eurove nga aeroporti i vetëm ndërkombëtar i vendit, Rinasi, Prokuroria e Posaçme ka dhënë konkluzionet përfundimtarë për një nga të akuzuarit si pjesmarrës në ngjarje, Talo Çelën i cili rezulton I shpallur në kërkim ndërkombëtar.
Në konkluzionet përfundimtare prokurori i çështjes Klodian Braho kërkoi dënimin e tij me 19 vite burgim. SPAK bëri pjesë të fashikullit hetimor edhe bisedat e Talo Çelës në SKY ECC me anëtarët e tjerë të grupit.
Në SKY Talo Çela shprehte shqetësim se mund të gjendeshin prova për përfshirjen e tij në supergrabitjen dhe se në rast se i del emri do arratisej në Brazil ku do të ndërronte identitet. Por avokati i tij ka kundërshtuar veprimin e prokurorisë së posaçme, me argumentin se ato mund të jenë vetëm indicie dhe jo prova.
Pasi dëgjoi Spak, trupi gjykues i përbërë nga Erjon Bani, Rudina Palloj dhe Elsa Ulliri caktuan datën 21 nëntor ora 10.00, për tu zhvilluar seanca e radhës ku do të dëgjohet mbrojtja dhe do të shpallet vendimi lidhur me Çelën, i njohur si një nga personat më të kërkuar në Shqipëri.
Ai u shpall në kërkim në kuadër të operacionit të koduar “Plumbi i Artë”, që çoi në kapjen e Nuredin Dumanit, Henrik Hoxhajt si dhe të disa personave të tjerë, pjesë e botës së krimit. Ishin dëshmitë e këtyre të fundit që zbardhen një sërë ngjarjesh kriminale, ku ishte i përfshirë dhe Çela.
Për grabitjen e vitit 2019, GJKKO dënoi në tetor të vitit të 2022 me 122 vite burg 7 të pandehurit e grupit kriminal. Klement Çala u dënua me 20 vite, ndërsa gjashtë të tjerët Oltion Veseli, Renaldo Sulaj, Saimir Cela, Oltion Pikli, Alkon Bengasi dhe Eldi Çala me 17 vite burg. Të dënuarit po e vuajnë dënimin në një burg të sigurisë së lartë.
Ngjarja ndodhi në 9 prill e vitit 2019, ku në pistën e aeroportit “Nënë Tereza”, në Rinas, Tiranë, persona të maskuar, nën kërcënimin e armëve të zjarrit, vodhën një sasi të konsiderueshme vlerash monetare të cilat po ngarkoheshin në avion dhe më pas gjatë shkëmbimit të zjarrit me Policinë, mbeti i vrarë njëri prej autorëve kryesorë të kësaj ngjarjeje, Admir Murataj.
