Gjykata për Krime të Rënda vendosi sot masë arrest me burg për Elton Piklin, me profesion kasap në Krujë, i cili u arrestua në Qafë-Thanë teksa vinte në Shqipëri si një nga autorët e dyshuar për grabitjen në Rinas. Ndërkohë po sot, një tjetër i arrestuar nga Kruja, ish-imami Oltion Veseli i lënë në burg, ka kërkuar përmes avokatit të tij që të hetohet në gjendje të lirë. Ai ka ankimuar masën e arrestit me burg, duke pretenduar se vendimi është marrë në mungesë të provave dhe fakteve.
***
Pas Alkond Bengasit, Oltjan Veselit, Renaldo Sulaj dhe Saimit Çelaj, Gjykata për Krime të Rënda vendosi arrest me burg edhe për Elton Piklin.
Pikli është i arrestuari i fundit i grupit të grabitësve të miliona eurove në aeroportin e Rinasit të identifikuar e arrestuar deri më tani nga Policia e Shtetit.
Ai u prangos pas kthimit nga Bullgaria, ndërsa para gjykatës ka mohur të jetë pjesë e kësaj gabitje duke u shprehur se prej 2017 kishte hapur në Krujë aktivitetin e tij privat si kasap.
Në kërkim për këtë ngjarje vazhdojnë të jenë disa persona mes tyre dhe vëllezërit Klement dhe Eldi Çala.
