A janë të përfaqësuara gratë në politikë dhe listat e zgjedhjeve të 11 majit. A duhet përdorur kuota gjinore apo të ketë barazi në garë mes burrave dhe grave.
Këto ishin temat e diskutuara në panelin e ‘Frontline’ mbrëmjen e sotme, të moderatores Marsela Karapanço. Të ftuara në Report Tv ishin Elena Kocaqi, kryetare e Partisë Aleanca Kombëtare, Eriselda Zotaj, kandidate e Djathtas për Zhvillim për qarkun e Fierit, Ilirjana Kuçana, kandidate e PD-së për qarkun e Durrësit dhe Ilva Gjuzi, zv/ministre e Turizmit dhe kandidate e PS-së.
Paneli ishte i një mendjeje se kuotat gjinore dhe maskilizmi në politike duhet të merrte fund dhe t’i jepej më shumë hapësirë faktorit grua. Madje të vendosej edhe shenja e barazimit dhe jo të përdorej kuota gjinore, me një grua në tre burra.
“Për femrat është e vështirë në Shqipëri, vërehet kjo edhe në hapësirën mediatike. Kjo është një censurë që u bëhet të gjitha grave, përfshirë atyre në politikë dhe veçanërisht mua, përjashto vetëm televizionin tuaj. Sherrin në Parlament e bëjnë burrat dhe jo gratë, ndaj terreni ka qenë i tillë, do e shohim se çfarë Parlamenti do të dalë. Duhet të marrë fund bërja e politikës me akuza, fyerje, duke u marrë me sherre personale apo me familjen, debate pa lidhje e shterpë. Këta janë njerëz të paaftë për t’u marrë me politikë, ata duhet të diskutojnë për programe, ide dhe punë, projekte dhe rezultate, një politikan duhet të jetë me integritet të lartë, shembull. Kjo mënyrë e të bërit politikë duhet të marrë fund”, tha Kocaqi.
Kurse Zotaj vuri në dukje se terreni politik është maskilist, teksa kërkoi më shumë kuota të barabarta dhe garë të tillë.
“Terreni është maskilist. Gruaja nuk është vetëm kuotë gjinore, sepse merr shumë vendime, në fusha të ndryshme. Vetëm në këtë formë mund t’u imponohemi maskilizmit. Nuk preferoj të përdor termin ndarës grua dhe burrë, pasi duhet të jemi të barabartë. Ne jemi më të forta se meshkujt. Në 34 vite politika shqiptare nuk ka prodhuar asgjë, përveçse ka kopjuar liderat e saj, të të dy partive të mëdha, pa vendimmarrje e figura për lidera të rinj e kjo është fatkeqësi e madhe. Kemi të njëjtën alternative me të njëjtën fytyrë si 20 apo 30 vite më parë. Në PD nuk bëhen asnjëherë analizat për humbjet. Kurse Rama ka dështuar me qeverisjen e tij, si në bujqësi, veçanërisht qarku i Fierit që përfaqësoj, fermerët të braktisur”, tha ajo.
Kandidatja e PD, Kuçana, vuri në dukje se gruaja është forcë e madhe edhe për politikën dhe se nuk duhet të kishte diferencime apo dhurata.
“Nuk ka më bukur sesa të ketë gra në politikë. Gruaja ka forca më të shumta sesa burrat dhe jo më kot Zoti ia ka dhënë këtë dhuratë. Politika nuk është dhuratë, duhet ta marrësh. Nuk duhet të përmendet termi kuotë, preferoj përballje të barabartë dhe jo me diferencime apo dhurata. Duhet të jemi si gra të para, si njisha. Të futesh e të bësh politike, në radhë të parë duhet të jesh i vërtetë. Duhet të sjellin shembullin personal se çfarë kanë bërë para se të hyjnë në politikë. Dhe jo të bëhen pazare. Pra të futemi me modelin tonë dhe jo me atë të atyre që na diktojnë. Listat e PS dhe situatën te mazhoranca e kemi parë, ata e kanë tani selinë te burgu i Durrësit. Ne kemi kandidatë përfaqësues në qarkun e Durrësit”, tha ajo.
Ilva Gjuzi, zv/ministre e Turizmit dhe kandidate e PS-së, teksa theksoi se në listat e mazhorancës ka më shumë se një të tretat kandidate femra, shpjegoi edhe deklaratën e saj “Edi Rama është 10 hapa para”.
“Duke parë listat e kandidatëve për deputetë, PS ka lista cilësore dhe i ka përfshirë ato për zgjedhjet e 11 majit, madje më shumë se kuotat, gati gjysma janë gra. E thashë se Rama është 10 hapa para për shkak të vizionit të tij dhe programit. Pra ato që ka thënë më 2013, në ato që mbaj mend unë kur erdhi në pushtet, po i realizon tani, pra e ka pasur atë vizion. Dhe ai ishte një plan 16 apo 17 vjeçar në atë kohë. Në krahun tjetër i pamë se si përfunduan listat e Primareve të PD-së”, u shpreh ajo.
Komente
