I dërguari i Shtëpisë së Bardhë për dialogun Kosovë-Serbi, Richard Grenell, tha se pret që takimi midis dy palëve të ricaktohet së shpejti.
Takimi i paraparë për datën 27 qershor në Uashington është anualuar, pasi Zyra e Prokurorit Special në Hagë ka paraqitur të mërkurën aktakuzë për krime lufte kundër presidentit të Kosovës, Hashim Thaçi.
Ky i fundit e ka anuluar pjesëmarrjen në takim, e më pas edhe kryeministri i Kosovës, Avdullah Hoti, e ka bërë një hap të tillë.
“Faleminderit kryeministër Hoti. E kuptoj vendimin tuaj dhe ne presim që ta ricaktojmë takimin së shpejti”, shkroi Grenell në një postim në Twitter.
Takimi në Shtëpinë e Bardhë është parë si rinisje e dialogut për normalizimin e marrëdhënieve midis Kosovës dhe Serbisë, i cili është ndërprerë qysh në fund të vitit 2018, pasi Kosova u ka vënë taksë 100 për qind mallrave të importuara nga Serbia, për shkak të fushatës së saj kundër pavarësisë së Kosovës.
Taksën që e ka vënë Qeveria e Ramush Haradinajt e ka zëvendësuar më 1 prill me masa reciproke tregtare ish-kryeministri i Kosovës, Albin Kurti.
Shtetet e Bashkuara kanë qenë kundër masave ndaj Serbisë, duke thënë se ato e pengojnë dialogun midis palëve.
Me largimin e Kurtit dhe ardhjen e kryeministrit të ri të Kosovës, Avdullah Hoti, Serbisë i janë hequr të gjitha pengesat tregtare.
Komente
Asnje njeri nuk duhet te ulet ne bisedime,qofte ne uashington,qofte ne bruksel.hapi i pare te jete njohje e shtetit te pavarur te kosoves.me pas hetimet e krimeve kunder njerezimit ndaj popullsise shqiptare.me pas,ulja ne bisedime per zgjidhen e problemeve.
Përgjigju