1 tetori në Greqi shënon dhe fillimin e marrjes së vaksinës së gripit për mbrojtjen nga virozat respiratore gjatë periudhës së dimrit. Në një kohë ku popullsia po vijon të vaksinohet kundër COVID-19, Ministria greke e Shëndetësisë tha se këto dy vaksina mund të merren edhe në të njëjtën ditë, pasi vaksina e gripit nuk ka ndikim në marrjen e vaksinave të tjera.
Autoritetet njoftuan në 30 shtator fillimin e periudhës së vaksinimit për virusin e gripit, duke theksuar se ekziston shqetësimi për ndërveprimin midis gripit dhe Covid.
Zyrtarët grekë të shëndetësisë nënvizuan se vaksina e gripit mund të injektohet në të njëjtën kohë me vaksinën e koronavirusit.
“Nuk ka rekomandime për mbajtjen e intervaleve midis vaksinave. CDC dhe të gjitha organet shkencore kanë deklaruar se vaksina kundër gripit mund të merret në të njëjtën kohë me vaksinën e koronavirusit, si dhe vaksinat e tjera” tha ministria greke e Shëndetësisë.
Në Greqi gjatë 24 orëve të fundit janë shënuar 2125 raste të reja dhe 36 viktima nga COVID-19.
Komente
