Policia e Shtetit dhe Interpol Tirana konfirmojnë arrestimin e 35-vjeçarit Fatjon Shabanaj në Kalithea të Greqisë, gjatë një operacioni në zonën ku edhe po fshihej prej katër vitesh, pasi akuzohet për tentativën e vrasjes bashkë me katër persona të tjerë të afërm e miq të tij, të një emigranti të kthyer nga Anglia në Berat, Iljaz Ismailit.
Burime zyrtare konfirmuan sot aksionin e kryer në fillimjavë, për të kërkuarin ndërkombëtar, i koduar “The Ëanted”.
“Falë informacionit të siguruar nga Departamenti i Policisë Kriminale në Policinë e Shtetit dhe shkëmbimit me Policinë greke, nëpërmjet Interpol Tiranës, u bë i mundur arrestimi në Greqi, me qëllim ekstradimin në Shqipëri, i shtetasit shqiptar F. Sh., 35 vjeç, lindur në Berat”, bëri me dije policia.
Sipas dosjes hetmore rezulton se Gjykata e Rrethit Berat, në vitin 2021, i ka caktuar masën e sigurisë “arrest në burg”, për veprat penale “vrasja me dashje”, mbetur në tentativë dhe “mbajtja pa leje dhe prodhimi i armëve, armëve shpërthyese dhe municionit”.
Në muajin maj 2021, në fshatin Poshnjë të Beratit, Fatjon Shabanaj dyshohet se ka qëlluar me armë zjarri ndaj shtetasit Iismailit, i cili si pasojë është plagosur. Shkak dyshohet se janë bërë konfliktet e vjetra mes tyre.
“Interpol Tirana vijon bashkëpunimin me Interpol Athinën, për finalizimin e procedurave të ekstradimit të tij. Policia e Shtetit, në bashkëpunim me partnerët ndërkombëtarë, vijon intensivisht punën për lokalizimin dhe kapjen e shtetasve të shpallur në kërkim ndërkombëtar”, bëri me dije Policia e Shtetit.
Ngjarja ka ndodhur më 26 maj 2021. Sipas hetimeve, në makinën e autorëve kanë qenë 5 persona, njëri prej tyre i armatosur. Ata kanë tentuar që ta marrin me forcë Ismailajn, por nuk ia kanë dalë dot, teksa autori i armatosur ka rrëshqitur dhe i ka rënë arma nga dora. Pas krimit, u ndlauan 2 nga autorët e dyshuar, Adriatik Shabanaj dhe Aurel Filaj, që e mohuan përfshirjen.
Komente
