Një protestë e doganierëve grekë nga data 2 prill deri më 4 prill do të sjellë bllokim të kalimit në pikat kufitare Shqipëri-Greqi. Kalimi është i bllokuar në të gjitha pikat e kalimit kufitar, Qafë Botë, Tre Urat, Kakavijë dhe Kapshticë.
Mjetet e vogla, mjetet e tonazhit të rëndë (kamionët), autobusët dhe shërbimet taksi ndalohet të kalojnë gjatë kësaj kohe në këto pika të kalimit kufitar.
Përjashtime do të ketë vetëm për qytetarët që kalojnë këmbësor dhe pa bagazhe, ashtu si edhe rastet për emergjenca shëndetësore.
"Kalimi i kufirit do të lejohet vetëm për këmbësorët, pa bagazhe dhe për personat me probleme serioze shëndetësore", ka njoftuar Ministria e Jashtme Greke.
Gazetari shqiptar në Greqi, Edmond Guri ka folur në Report Tv për grevën e doganierëve grekë. Guri theksoi se asnjë mjet nuk do të lejohet të futet në Greqi, për shkak të kësaj greve në datat 2 prill deri më 4 prill.
Sipas Gurit, doganierët kërkojnë nga këto greva paga më të larta, kushte më të mira pune si edhe shtim personeli. Guri shpjegoi se kalimi i këmbësorëve do të lejohet normalisht, si edhe rastet e urgjencës.
“Është njoftuar nga Unioni i Doganierëve grekë, për të gjitha pikat kufitare për një grevë. Do lejohen të kalohen vetëm këmbësorët që hyjnë apo dalin dhe rastet e emergjencë, që janë të sëmurët. Greva fokusohet tek automjetet, kalimi i këmbësorëve do zhvillohet normalisht. Vetëm doganierët janë në grevë.
Nëse dikush niset nga Shqipëria në Greqi nuk do të lejohet të futet dhe anasjelltas dalja nga Greqia në Shqipëri. Vetëm qytetarët që kanë leje qëndrimi apo me vizë 3 mujore, kanë të drejtë të futen me këmbë dhe jo me mjet.
Ishte paralajmëruar më herët çështja e doganierëve grekë. Kërkojnë përmirësim të kushteve të punës rritje rroge dhe shtim personeli”, u shpreh Guri në Report Tv.
