Gripi i tipit A po qarkullon në të gjithë vendin. Epidemiologu në ISHP, Artan Simaku thotë se për shkak të prezencës së dy viruseve, mund të ketë një përkeqësim të situatës në vend.
“Në ndryshim nga viti i kaluar që nuk ka patur fare grip, javën e fundit është evidentuar qarkullimi i gripit në disa rrethe të vendit. Janë vetëm disa raste por janë të shpërndara në disa rrethe të vendit çka flet për një qarkullim të gripit pothuajse në të gjithë vendin dhe kjo mund ta përkeqësojë në vazhdimësi situatën sepse kemi bashkëqarkullim edhe të virusit të Sars-Cov2 edhe të virusit të gripit”, tha Simaku.
Për të prekurit ndryshe nga fazat e para të Covid-19, tani sipas Simakut e kanë vështirë të bëjnë dallimin mes koronavirusit dhe gripit pasi simptomat janë thuajse të njëjta.
“Janë shumë të ngjashme me COVID vetëm se gripi nuk shkakton humbjen e shijes dhe të nuhatjes ndërsa simptomat e tjera janë pothuajse të njëjta dhe klinikisht faktikisht është e vështirë për ti dalluar”, u shpreh epidemiologu.
Të paktën për momentin, mjekët vazhdojnë të shohin vaksinën si të vetmen mundësi për tu lehtësuar nga COVID dhe nga gripi.
“I bëhet thirrje popullatës që përveçse vaksinimit të COVID të vaksinohen edhe ndaj gripit sepse vaksinave COVID të mbron vetëm nga COVID-i dhe vaksina e gripit të mbron vetëm nga gripi”, tha ai.
Megjithatë aktualisht nuk ka asnjë rast me grip që të jetë në gjendje të rëndë shëndetësore. Sipas ekspertëve të dyja vaksinat ajo e gripit dhe COVID mund të kryhen njëkohësisht pasi nuk shkaktojnë asnjë problem.
SI.E.//ReportTv.al