Përgjegjësi i grupit operativ të OSHEE, Prrenjas, Reshit Karriqi është goditur pasditen e së martës për shkak të detyrës. Sipas gazetarit të Report Tv, Karriqi është goditur me grushte dhe mjete të forta në fytyrë dhe trup nga Artan Kokonozi, banues në Prrenjas.
Kokonozi rezulton të ketë zaptuar tri muaj më parë një ambient që është në pronësi të OSHEE, duke sistemuar familjen në të dhe duke e kthyer në banesë. Përgjegjësi i grupit operativ e ka denoncuar zaptimin e këtij shtetasi në postën e Policisë në Prrenjas. Ka qenë pikërisht kjo arsyeja se përse ai është sulmuar nga Kokonozi teksa po kthehej për në zyrë.
Agresori, i cili njihet në zonë si person me probleme të shëndetit mendor, është frenuar nga ndërhyrja e kalimtarëve. Ai mësohet se ka kërcënuar me jetë punonjësin e OSHEE-së dhe familjarët e tij, si dhe ka dëmtuar për të disatën herën derën e kabinës kryesore elektrike në qytetin e Prrenjasit. Artan Kokozoni mësohet se aktualisht ndodhet në komisariat, për t'u pyetur rreth situatës në fjalë.
Komente
