Të premten më 17 mars boksierët shqiptarë të boksit profesionist do kenë përballje spektakolare ndaj kundërshtarëve respektive në evenimentin e quajtur ‘Grushti i Hekurt’ që organizohet në kompleksin olimpik ‘Feti Borova’. Medalisti shqiptar në boksin Olimpik, i renditur i treti në botë Alban Beqiri, do përballet me kampionin e Moldavisë Vasile Negara. Ky i fundit ka 6 ndeshje në boksin profesionist, 3 fitore dhe 3 humbje kundrejt 6 fitoreve në 6 ndeshje të 28-vjeçarit Alban Beqiri, i cili për peshat e mesme renditet i 453 në botë.
“Të gjitha i kam fitore, asnjë humbje asnjë barazim. Shpresoj që të mbaj këtë ritëm dhe do mundohem të bëj më të mirën sepse dua të ngjitem sa më lart në renditjen e boksit botëror. Kundërshtari është i fortë, më i miri i Moldavisë. Mban vendin e parë si në boksin olimpik ashtu edhe në atë profesionist. E kam studiuar, jam përgatitur dhe më të mirën do jap si unë si ai. Shpresoj t’ia dal. Të fitojë më i miri. Ky është sport, por unë do të bëj më të mirën,”-u shpreh Alban Beqiri, boksier.
Publikun pritet ta mbajë të mbërthyer me emocione edhe përballja e boksierit tjetër shqiptar Alban Bermeta, i cili sfidon letonezin Eduards Vaisa.
“Duke e ditur që është një ndeshje e fortë jemi përgatitur mirë. Jam në formë dhe shpresoj që çdo gjë të shkojë siç duhet. E kam studiuar kundërshtarin. Është i mirë, ka shumë eskperiencë, por të lejon të bësh boks. Është një ndeshje e pasur,”-tha Alban Bermeta, boksier.
Pas disa vitesh përballje kaq të rëndësishme të boksit profesionist do zhvillohen në kryeqytet, publiku i të cilit do ketë mundësinë të shijojë 8 ndeshje.
“Tani që do organizohet në Tiranë do ketë mbështetje më të fortë. Jam i sigurtë për këtë. Uroj që të ti bëj krenar ashtu siç pret të më bëjnë dhe ata mua,”-u shpreh Alban Beqiri, boksier.
“Gjithmonë këtu në Tiranë e kami patur publikun shumë të zjarrtë. Kanë qenë një mbështetje shumë e madhe për sportistët,”-deklaroi Alban Bermeta, boksier.
Komente
Alban Beqiri me 6 ndeshje te bera dhe 6 te fituara eshte i 3 apo i 453 ne renditjen boterore?
Përgjigju