Hakimi i e-maileve të prokurorëve të SPAK, mes tyre edhe tentativa ndaj kreut Altin Dumani, është skandali më i madh shtetëror i ndodhur ndonjëherë.
Kështu e cilësoi deputeti Enkelejd Alibeaj, njëkohësisht kreu i ‘Djathtas 1912’ ngjarjen e fundit të ndodhur dhe që është bërë publike në media.
Me një video-postim në llogarinë e tij personale në rrjetin socoal Facebook, ligjvënësi kërkon ndërhyrjen e menjëhershme të strukturave për transparencë, marrje të masave dhe ndëshkim të autorëve. Por ai kërkoi gjithashtu reagimin e drejtuesve të shtetit publikisht, si dhe gjetjen e mendjes kriminale që organizoi këtë krim me autorët e arrestuar.
"Kush është bashkëfajtori?!", pyet deputeti, i cili këto zgjedhje të 11 majit do të kandidojë nën siglën e koalicionit "Djathtas për Zhvillim".
Alibeaj inkurajoi SPAK-un që të shkojë “deri te koka e grupit kriminal”.
Video-Postimi i Enkelejd Alibeaj në Facebook:
“Lajmi për hakimin e e-maileve të prokurorëve të SPAK-ut, mes tyre edhe kreut Altin Dumani, është skandai me përmasa më i madhi i ndodhur ndonjëhëerë. Një kërcënim serioz për Drejtësinë dhe për Sigurinë Kombëtare. Një tregues i kapjes së institucioneve nga elementë të korruptuar dhe kriminalë.
Përfshirja e zyrtarëve dhe ish-zyrtarëve të lartë në formën e grupit të strukturuar kriminal, tregon se kërcënimi vjen nga brenda shtetit. Fal SPAK sulmi është neutralizuar në kohë. Por qeveria nuk mund të hesht apo të justifikohet. Duhet transparencë, ndëshkimi i përgjegjësve dhe masa urgjente për të mbrojtur institucionet e drejtësisë nga sulmet kriminale.
Sot Edi Rama dhe Fatmir Xhafa u mburrën për reformën e tyre të Komisionit Antikorrupsion, por heshtën për këtë skandal. Sot, ata të dy së paku, kanë detyrimin ligjor të shprehen dhe të marrin pozicion publik mbi këtë skandal shtetëror.
Heshtja e tyre dhe çdo përpjekje për ta relativizuar këtë ngjarje është bashkëpunim me ata që minojnë drejtësinë dhe shtetin e të drejtës. Sulmi i vërtetë u neutralizua, ekzekutorët janë kapur, por mendja që e organizoi është ende në liri. Ndaj inkurajoj SPAK që të shkojë te koka e grupit kriminal, sa më shpejt!”.
Komente
