Sali Berisha ka njerëz brenda SPAK-ut dhe BKH-së që i japin informacione sekrete dhe më pas ai del i lexon në media dhe i bën publike, kur ato janë sekret.
Edhe rasti i harkimit të fundit të prokurorëve të SPAK lidhet direkt me këtë dyshim, pasi zyrtarë dhe ish-zyrtarë hynë në e-mailet e tre prokurorëve dhe madje tentuan të vidhnin edhe të dhëna nga posta elektronike e kreut të institucionit, Altin Dumani dhe serverëve.
Kështu u shpreh avokati Idajet Beqiri sot në ‘Studio Live’, duke e lidhur edhe me një rast konkret si tangente me dyshimin e ngritur se pas ngjarjes mund të qëndrojnë edhe njerëzit e ish-kryeministrit. Beqiri tha se edhe një denoncim që ai i kishte dërguar SPAK-ut dhe Dumanit kohë më parë, u rrodh nga brenda institucionit direkt te Berisha dhe ky i fundit e lexoi në publik, duke përmendur edhe detaje që i dinin vetëm përfaqësuesit e akuzës.
Edhe avokati Edmond Petraj, i ftuar në panel, e cilësoi ngjarjen si tepër të rëndë, duke e nënvizuar faktin se pikërisht Berisha ishte personi që lexoi informacione sekrete që ishin vjedhur nga SPAK, në ngjarjen që u mbajt e fshehtë. Bëhet fjalë për detajet e dosjes “Toyota Yaris”.
“E konsideroj guxim dhe çmenduri këtë akt, të arrish të futesh deri aty, te ‘foleja e grerëzave’, te Prokuroria Speciale që lufton krimin e organizuar dhe korrupsionin shtetëror, si mund të arrijë të hakerojë e-mailet e tyre për të marrë informacione nga zyrtarët. E para sa siguri kanë mjetet e prokurorëve dhe SPAK për mbrojtjen kibernetike, pasi flitet për karakter tepër sekret të hetimeve, që lidhen edhe me sigurinë kombëtare, si mund të lejohen pa mbrojtje të fortë kibernetike, teksa u ndërhyjnë dhe futen në zyrat e tyre, kompjuterat, e-mailet dhe rrjetin e tyre. Kjo kërkon reagim të fortë të institucioneve. Duhej dhënë alarm dhe Komisioni i Ligjeve të mblidhej urgjent për këtë ngjarje, është skandal i madh. Kuvendi duhet të alarmohej. SPAK të bëjë transparencë për ngjarjen”, tha Beqiri.
Më tej ai ngriti edhe dyshimet e bazuara të tij, se brenda SPAK-GJKKO ka njerëz që bashkëpunojnë me persona të politikës, në këtë rast Berishën dhe politikanët rreth tij, si Belind Këlliçi.
“Te hetuesit e BKH-së ka elementë që bashkëpunojnë me persona jashtë, japin informacione për të tjerët. Kujtoj rastin Berisha që përmendi emri im tek Altin Dumani, duke thënë se jam anëtar i tij, pasi lexoi informacionin se kreu i SPAK kishte një letër të dërguar nga ana ime për Belind Këlliçin, në lidhje me bisedat e tij me drejtoreshën e shkollës. Nga i dinte Berisha këto? Si i gjeti këto informacione, kur e dija vetëm unë që e çova dhe prokurori i çështjes? Pra ka probleme të brendshme atje, ka informacione që rrjedhin nga brenda. Berishës ia dhanë nga brenda SPAK kallëzimin tim. Pra më parë i merr vesh Belo gajdexhiu, para se ta marri vesh Dumani, në rastet kur ky nuk është aty në institucion. Pra Belindi informohet herë pas here më parë se të tjerët, i merr vesh më parë ai kallëzimet sesa prokurorët. Madje unë mendoj se edhe Dumanit po ia punojnë aty në disa raste. Edhe për rastin e prokurores Kaçkini, më parë i merr vesh Këlliçi sesa ajo dhe Dumani. Puna është a do ketë një verifikim për këta prokurorë të SPAK apo agjentë”, denoncoi avokati në Report Tv.
Por jo vetëm kaq, pasi ai edhe për rastin e prokurorit Olsi Dado shprehu rezerva për mënyrën se si institucionet u treguan pasive dhe këtu shikon ndërhyrje të fuqishme të politikës. Ai shprehet i bindur se brenda SPAK dhe BKH ka ‘spiunë’.
“Ose fakti që aty është prokuror Olsi Dado, në kundërshtim me ligjin, nga noter në prokuror dhe këta nuk japin përgjigje për këtë rast, ku ish-presidenti mori vendim antiligjor dhe të pavlefshëm, tani veprojnë si struci dhe nuk reagojnë. Ka elementë në SPAK që dekonspirojnë informacionet. Të jeni të bindur se asgjë nuk ndodh aty pa pasur ndërhyrje nga brenda. Po të bëhet hetim, do dalin ose anëtarë të BKH-së dhe prokurorë të caktuar, që janë bërë pis. Por ka edhe raste kur janë blerë informacione nga BKH-ja”, nënvizon Beqiri.
Kurse avokati Edmond Petraj kujtoi se ngjarja kishte ndodhur pikërisht disa ditë para se Berisha të lexonte informacione sekrete të dosjeve në media apo Parlament, kryesisht të asaj “Toyota Yaris”. Edhe Dumani sipas tij e pranoi problematikën dhe se po punohej, derisa u zbuluan autorët, pasi lihet gjurmë. Sipas avokatit, edhe amerikanët ndaj u kthyen në SPAK, pasi ishin ekspertë të IT-së dhe rritën nivelin e sigurisë dhe ndihmuan në hetime.
“U tentua të merreshin të dhëna në e-maile, janë të dhëna zyrtare, komunikime. Por duket se edhe amerikanët që erdhën në SPAK duket se kanë qenë IT-të e kibernetikës, për sistemin “Data”, serverin dhe mbrojtjen e sistemit. Pra ata kanë ardhur posaçërisht për shkallën e sigurisë në serverin ku mbahen të dhënat arkivore dhe dokumentore. Prokurorët kanë përdorim në këtë server, me kod të veçantë. Rrjedhja ka kohë që ka ndodhur, se nga e dinte Berisha që lexonte ato materiale në publik, në media. Edhe Dumani e ka thënë këtë që edhe ne jemi në verifikim të punës sonë. Është përgjegjësi e madhe, është çështje e hetimit. Por të arrish të marrësh nga serveri këto të dhëna, ka kohën e saj, se janë me giga materiale. Kanë dalë në media informacioni, si dosja Toyota Yaris, ku u lexuan materiale në media e publik, me atë fjalor banal, si u siguruan ato? Pra ka pasur një rrjedhje informacioni”, tha ai.
Avokati shpjegoi edhe procedurën se si hyhet në informacionet e serverit të SPAK:
“Prokurori i jep akses edhe agjentëve të BKH-së nëse hyjnë në dosje apo materialet e serverit, pra jepet leje. Kush tenton të hyjë në e-mail, sigurisht që lë gjurmë dhe ka lënë të tilla, është e gjurmueshme. Çështja është se ku kanë hyrë konkretisht. Mendoj se pas tyre (të arrestuarve) fshihen persona të tjerë, mundësisht një personazh të rëndësishëm për të marrë informacione të posaçme, por edhe për të penalizuar këta prokurorë për raste të caktuara hetimi. Psh., Berisha ka prokuroren Millonai, por kjo do parë, do hetuar dhe do verifikuar. PD e ka ngarkuar jashtë mase SPAK-un këto kohë. Edhe për rastin që denoncoi zoti Beqiri, SPAK duhet të kishte reaguar, të ngrinte grupo, sesi doli ky informacion dhe nga doli”.
Edhe pse e vështirë për t’u hetuar sepse kanë kaluar vite, dosja “Gërdeci” ka një mundësi proceduriale hetimi për shkak të rastit amerikan.
Drejtësia shqiptare mjafton që të marrë për referencë procesin që është bërë në SHBA dhe nëpërmjet asaj dosjeje të procedojë edhe në Shqipëri.
Këtë mendim ndanë dy avokatët Idajet Beqiri dhe Edmond Petraj sot në ‘Studio Live’, duke vënë theksin se edhe kjo çështje po zvarritet, pasi një shtet i tërë është i përfshirë, ku kryesori mbetet përsëri Sali Berisha.
Madje avokati Beqiri shkoi më tej, se politika i kishte shtrirë duart edhe te dosja “Gërdeci”.
“Dosja Gërdeci ka kaluar shumë kohë. Kam përshtypjen do ngeci, ka kaluar shumë kohë, mungojnë provat. Nuk jemi më në atë kohë të ngjarjes, personazhet, institucionet etj., nuk funksionojnë më e kështu me radhë. Thjesht të marrin vendimin e gjykatës Amerikane dhe kaq, të verifikojnë atje se si është vepruar dhe të vendosin, precedenti juridik është”, tha Petraj për Report Tv.
Për avokatin Beqiri provat ishin të dukshme, shkresore dhe me deponime, kryesisht ato të dosjes në Amerikë, që janë të dokumentuara tashmë edhe me deponime e dëshmitarë.
“Politika i ka shtrirë duart edhe te dosja Gërdeci. Ajo është dosje shumë e thjeshtë për ta provuar, edhe për faktin e dosjes amerikane dhe dëshmive të dy amerikanëve për trafikimin, por jo vetëm kaq. Kosta Trebicka i ka dhënë dëshmitë këtu dhe në SHBA dhe ai rrëfim ishte i provuar, edhe nën betim, kur ke edhe vendimin e Gjykatën e Strasburgut që e thotë hapur çështjen, por duke parë personazhet e përfshirë si Sali Berisha, Fatmir Mediu, Aldo Bumçi, Mihal Delijorgji, Shkëlzen Berisha etj., është e lehtë të provohet. Pyetja është e thjeshtë që provon faktin. Pse e bëre Gërdecin këtu? Duhej 32 km larg banesave, por ata e bënë afër kryeqytetit dhe ndodhi ajo që ndodhi, ka përgjegjësi për ato vrasje. Janë këta persona që i bënë këto vrasje. Është një krim shtetëror, krimin e bëri shteti dhe duhet të përgjigjet deri më një. Berisha, Mediu dhe Bumçi kishin në dorë ta ndalonin, por lejuan ngritjen e fabrikës atje, në mes të banesave”, tha avokati në ‘Studio Live’.
Të pranishmit ndanë mendime edhe për çështjen e fundit, ku GJKKO urdhëronte SPAK të merrte nën hetim deputeten socialiste Olta Xhaçka dhe bashkëshortin e saj, ish-deputetin Artan Gaçi.
Juristi petraj e quajti të paprecedentë, pasi GJKKO nuk ka tagër të urdhërojë SPAK se çfarë të bëjë, por vetëm të marrë vendime.
“Gjykata po imponon organin e akuzës që të filloj hetime. Jo, nuk mund të ndodhë, organet e drejtësisë janë të pavarura, është tagër i Prokurorisë përcaktimi apo klasifikimi i akuzës, flas për rastin e Olta Xhaçkës dhe Artan Gaçit, ku GJKKO i kërkoi SPAK- që ta hetojë. Jo, nuk veprohet kështu, GJKKO nuk mund të imponohet, ajo jep vetëm vendimin”, tha avokati.
Kurse Beqiri nënvizoi se:
“GJKKO ka kaluar në ekstrem tjetër tani. Tani ata i shikojnë dosjet si kompetencë për urdhër, e thonë “jemi ne këtu, urdhërojmë ne”. Madje ka edhe situata krahinore, pushteti, paraje, miqësie, farefisnor e tjera. Vetëm GJKKO nuk mund të jetë ajo, është kthyer në një gjykatë lolo”.
Një tjetër temë diskutimi në “Studio Live” të moderatorit Arbër Hitaj, ishte edhe dosja e aferës “Partizani” dhe shtyrja e seancave njëra pas tjetrës me procedurë.
Avokati Idajet Beqiri tha sot për Report Tv se kjo është e paprecedentë, një rast ku dukshëm ka presione apo ndërhyrje të Sali Berishës dhe vajzës së tij te trupa gjykuese dhe prokurorët që të zvarritet, pasi nuk ka ndodhur kurrë më parë që një seancë paraprake të shkojë deri në 7 muaj.
Së bashku me avokatin tjetër, Edmond Petraj, ata ranë dakord se kjo ishte e paprecedentë, duke e krahasuar me raste të tjera ku në dosje kishte deri në 50 të pandehur dhe zvarritja nuk kishte shkuar më shumë se 45 ditë.
Beqiri u shpreh se GJKKO po kthehet në “lolo” dhe gjithashtu po e kthen institucionin tek modelet e “Gjin Gjonëve dhe Tik Llallëve”, duke kujtuar ish-gjyqtarin dhe ish-kryeprokurorin e dënuar.
Avokati shfaqi edhe pesimizëm të krijuar nga standardet e dyfishta nga GJKKO-SPAK kohët e fundit për çështje të ndryshme, si rasti i kryebashkiakut Erion Veliaj që mbahet në qeli, pothuajse për akuzë e dosje të ngjashme me atë të Berishës, i cili është i lirë.
“Dosja ‘Partizani’ është rasti për ta thënë se u krijua një optimizëm i madh me reformën në drejtësi, ku ish-kryeministri u mor nën akuzë dhe i pandehur, ku u zbulua sesi Berisha nxirrte vendime në Këshillin e Ministrave për të pasuruar vajzën e dhëndrin, por pastaj shto ujë e miell e katandisën duke e nxjerrë nga arresti shtëpiak dhe në fund të lirë. Ndryshe vepruan me standardin Veliaj, për të njëjtën dinamikë çështjeje pothuajse dhe që këtu ngrihen pikëpyetje. Një muaj e ka Kodi i Procedurës Penale për çështjen e seancës paraprake, por gjyqtarja e ka shtyrë, kur ka detyrë ose ta kalojë në proces, ose ta kthejë. Jo ta shtyjë një muaj, dy, tre e kështu me radhë, ku mund të digjen edhe afatet. Gjyqtarja kishte për detyrë jo ta shtynte pa fund, por ta kalonte në proces.
Çfarë do të thotë kjo? Që GJKKO është kapur nga Sali Berisha dhe vepron e vendos ato që thotë Argita Berisha, kjo gjykatë tregon se është e kapur. Komisioni i Ligjeve dhe Kuvendi duhet të mblidhet menjëherë. Të verifikohet se çfarë po ndodh. Kjo ngre pikëpyetje të rënda dhe e bën GJKKO-në në dyshim që po na kthen te Gjin Gjonët e Tik Llallët e kështu me radhë. Për raste të tjera GJKKO nuk e çon as një javë dhe e kalon menjëherë në proces, kurse kjo po shkon 7 muaj. Unë mendoj se është presioni i Berishës ndaj Gjykatës dhe porositë e Argitës ndaj prokurorit apo gjyqtarit, për ta shtyrë. Ka dosje me 32 persona dhe nuk ka zgjat seanca paraprake më shumë se 40 ditë, e njëjta gjykatë flasim, GJKKO”, vijon ai.
Më tej avokati kujtoi se Berisha është i përfshirë në të paktën 22 krime që nga nisja e karrierës së tij politike dhe se SPAK po fle mbi dosje, duke kujtuar skedarin e ngjarjeve.
“SPAK po fle mbi dosjet e forta, sidomos ato të Berishës, duke nisur nga 21 janari, Gërdeci, Haklajt, floriri i Krrabës, sulmi ndaj ambasadës së SHBA-së dhe ambasadores Mariza Lino, të gjitha të faktuara e kopsitura, me dëshmitarë okularë, me prova shkresore, urdhra etj., e këta nuk ecin. Prej vitit 2019 Berisha ka kryer 22 krime të kryera. I kemi thënë SPAK ndiq paranë, të shikojë vilat e Berishës në Greqi, Belgjikë, Itali etj., ia kemi dhënë me zona konkrete, edhe për Metën, pse nuk veprojnë. U gjetën vilat e Berishës jashtë vendit dhe u denoncuan”, u shpreh Beqiri.
Edhe avokati Edmond Petraj, u shpreh në studio se vërtetë kjo dosje ka shkuar shumë gjatë për një seancë paraprake që nuk duhet të zgjasë më shumë se një muaj sipas procedurës.
Ai nënvizoi se edhe gjyqtarët dhe prokurorët duhet të kontrollohen nga ILD, pasi edhe vetë ky institucion ka nevojë për reformë.
“Kjo dosje duhet të kishte marrë vendimin, kalon apo nuk kalon, kërkohet apo jo gjykim i shkurtuar. Kjo seancë është më e rëndësishmja dhe gjithashtu gjyqtari. Kjo dosje duket se ka mbetur tek konkluzionet e avokatëve që e shtyjnë procesin me mungesa. Kam qenë në një dosje me 45 persona dhe nuk zgjati më shumë se dy muaj. Ndoshta ka mbetur te pjesa e avokatëve, ose te gjyqtari i trupit gjykues. Po që ka shkuar gjatë, ka shkuar vërtetë gjatë. Edhe te ILD mendoj se duhet të ketë një lloj reforme, është institucion ai e ka përsipër, të bëjë audit për këto raste, se prokurorin nuk e verifikon prokurori e gjyqtarin gjyqtari, por e bën ILD-ja. ILD duhet të kalojë një reformë të brendshme”, theksoi ai.
Komente
