Hakimi i sistemit të sigurisë kibernetike të SPAK-ut është edhe lajmi më i rëndësishëm i ditëve të fundit që ka kapur në befasi të gjithë opinionin publik, pasi bëhet fjalë për institucionin më të rëndësishëm të drejtësisë.
Kjo temë u trajtua mbrëmjen e sotme (3 prill) në studion e ‘Frontline’ në Report Tv.
Por të ftuarit në panel ndanë mendim të përbashkët se pas dy të ndaluarve qëndrojnë persona të tjerë, pasi është e pamundur që dy njerëz të zakonshëm të ndërmarrin një rrezik kaq të madh pa mbështetje. Pyetja që ngrihet është motivi dhe kush qëndron pas tyre.
“Informacionet janë të pakta dhe çështja e ndërlikuar. Nuk mendoj se janë këta dy persona që kanë thyer sistemin e një institucioni kaq të rëndësishëm, sepse duhet parë kush janë lidhjet pas tyre. Sepse ka porositës e prapavijë, por shpresoj të mos jetë politike. Thuhet se nuk ka bashkëpunim të brendshëm, por nuk dihet nëse ka pasur apo jo ndihmë. E-mailet janë zyrtare, jo private, pra janë të mbrojtur. A ka përdorur ndonjë nga ata e-mailin zyrtar jashtë institucionit, pra një gabim njerëzor që dhe kushton. Si precedent është ai i SHBA me aplikacionin Signal. Masat e sigurisë duhen rritur, përforcuar, sepse as sistem antidron nuk ka SPAK-u”, tha eksperti i sigurisë, Fatjon Softa.
Gazetarja Aida Topalli dha disa detaje të hetimit deritanishëm, mes tyre edhe fakti se dy autorët e arrestuar kanë vepruar nga një ambient i jashtëm në Tiranë, kullë, kurse një prej tyre, ish-zytrari i IKMT-së kishte bërë kallëzim më parë për shkarkimin nga detyra, ndaj ministrit të linjës.
“SPAK dha njoftim të rëndësishëm ku sqaroi se ndërhyrja ka qenë nga jashtë dhe jo nga brenda. Por pikëpyetja është siguria e sistemit kibernetik të SPAK-ut, niveli i mbrojtjes. A ka pasur portë të hapur që personat e shfrytëzuan për të hyrë dhe thyer sistemin e SPAK? Ka qenë IT që e ka dhënë alarmin i pari, se në kompjuterin e Enkelejda Millonait ishte ndërhyrë. Po kështu edhe në ato të dy prokurorëve të tjerë, që u konstatua nga verifikimet. Ndërhyrja u bë nga një ambient apo kullë në Tiranë. Ka pasur dy logime telefonash të personave të arrestuar, tek zyra e prokurorisë. Një funksionar shtetëror i paraburgimit të Vlorës, 3 dosje të marra prej andej, ku një është e një biznesmeni, një e ministrit të mazhorancës dhe një zonje, person i afërt i biznesmenit në fjalë. Këto materiale janë dërguar tek ish-zyrtarë dhe zyrtarë të tjerë. Njëri i Burgjeve dhe tjetri i IMT-së. Ka lidhje të afërta dhe familjare mes të arrestuarve dhe personave të dyshuar ku janë gjetur materialet hetimore të vjedhura, një është sekretar i përgjithshëm i një ministrie dhe tjetri ish-drejtor burgjesh, daja i një prej të ndaluarve”, tha gazetarja.
Ish-kryepolici Shemsi Prençi shkoi më tej, duke ngritur dyshimin me një informacion jo të konfirmuar zyrtarisht, se pas sulmit fshihet një ish-ministër, me qëllim sulmin ndaj zyrtarëve të tjerë. Pra target nuk ka qenë shantazhi apo sulmi ndaj prokurorëve të SPAK, por ndaj zyrtarëve nën hetim.
“Përgëzoj SPAK që veproi në kohë rekord për të zbuluar këtë hakërrim, pavarësisht me ndikim nga brenda apo jashtë. Po sikur me këtë të kenë punuar ustallarë. Po sikur strategu i luftës të jetë më ustallar se ustallarët, të jetë një ministër psh. Përplasja e madhe ka filluar, brenda gardhit socialist. Në krye të kësaj ngjarje është një ish-ministër dhe zyrtar dhe ish-zyrtar të lartë. Pra një ish-ministër që kërkon t’i nxjerrë lakrat një ish-ministri tjetër. Janë mbi 190 faqe materiale. SPAK ka paralajmëruar edhe median që të mos i publikojë, sepse mund të ketë edhe faqe të tjera. A ka shkuar SPAK te ustallarët e vërtetë që qëndrojnë pas Zambak Gjonit dhe Arnold Rrokajt. SPAK i bëri hetime të fshehta, s’ia tha as Policisë. Unë mendoj se SPAK e di se kush qëndron pas”, u shpreh Prençi.
Eksperti i sigurisë Fisnik Basha u shpreh:
“Guxim mjaft i madh nga dy persona që s’kanë asnjë lidhje me politikën, biznesin, s’janë pjesë as vete e hetimit apo të jenë anëtarë të një grupi kriminal të organizuar. Për të tre dosjeve ka dëmtim të hetimit, të dhënat janë sensitive, sepse nëse shkojnë në duart e personave të tjerë cenojnë këtë hetim, sepse u shkojnë në favor. Por nuk dihet se sa dosje janë, tre apo më shumë, sepse SPAK është treguar i rezervuar. Nuk dihet se si këta dy persona kanë thyer portën më të rëndësishme dhe të sigurt në ditët e sotme, të SPAK-ut. Dy persona amatorë kanë thyer portat e rëndësishme të një institucioni si SPAK, kjo na lë të kuptojmë se ka hakera brenda vendit dhe për interesa brenda vendit dhe nuk janë fuqi ndërkombëtare të caktuara”.
Komente
