Shumica e partive të reja politike u formuan pasi Lulzim Basha përjashtoi nga PD-ja Sali Berishën dhe tani janë rikthyer përsëri tek ai, ndërsa janë mashtruar për fushatën elektorale duke mos u përfshirë as në listat e opozitës.
Ky është edhe shkaku që këto parti të vogla nuk pranuan ofertën dhe marrëveshjen e Koalicionit Euroatlantik të Lulzim Bashës, ku të gjithë janë të barabartë në garë, duke zgjedhur që pjesa më e madhe të shkojnë te Berisha.
Nëse do kishte bashkim të partive të vogla dhe të reja të opozitës, shanset për rezultat do ishin më të larta dhe vota do ishte e fortë, por ato refuzuan.
Kështu u shpreh sot në “Studio Live” kandidati për deputet i KEA në zgjedhjet parlamentare të 11 majit, Azgan Haklaj. Bashkë me të ishte i ftuar edhe një nga krerët e “Lëvizjes Bashkë”, Redi Muçi, njëkohësisht edhe i pari si kandidat i listës së Tiranës.
“Nëse partitë e vogla do bashkoheshin me ne, do e fuqizonim sistemin dhe forconim votën. Ato morën vendimin e tyre. Dita e pluralizmit politik është 9 shtatori, kur Berisha u shpall non grata. Pas kësaj ditë që është pluralizmi i vërtetë i demokracisë së vendit, u krijuan edhe partitë e vogla. Pasi Basha përjashtoi Berishën nga PD, dolën partitë e reja, që në fakt u rikthyen te Berisha përsëri një pjesë e tyre. Shumë prej tyre u kthyen te Berisha firmosën një marrëveshje ‘xhentelmenësh’, i mashtroi Berisha, dhe as nuk janë në lista. Ne u thamë hajdeni bashkohuni, si të barabartë mes të barabartëve”, shpjegoi Haklaj.
Më tej ish-deputeti i PD-së, nënvizoi se Koalicioni Euroatlantik do të marrë rezultat më pozitiv se në vitin 2023, teksa akuzoi se opozita e PD-së është marrë peng nga mazhoranca, që i dha vulën Sali Berishës, madje kanë edhe marrëveshje të përbashkët për disa nga deputetët kandidatë të shkëmbyer në lista.
“Do marrim rezultat shumë më të mirë se i vitit 2023. Opozita është marrë peng nga Edi Rama dhe Belinda Balluku për çështjen e vulës, ndërhynë te gjyqtarët dhe ia dhanë vulën Sali Berishës. Berisha dhe Rama bën ligj për vete me listat e mbyllura. Demokratët e kanë kuptuar se Berisha i ka mashtruar, ai listat i bëri për ata 46 deputetë të vetët që nuk e di nëse do i marrë, por edhe për të luftuar SPAK-un dhe Drejtësinë. Ne e mbështesim hapur SPAK-un. Ne kërkojmë fundin e doktrinës dhe binomit PD-PS. Ne jemi të vetmit që kërkojmë vettingun politik, pastrimin e politikës nga ky sistem. 12 të Rithemelimit dhe 25 të PS që janë në listat e deputetëve po i bëjnë karshillëk SPAK, sepse janë me probleme. Pra ne kërkojmë përjashtimin dhe moskandidimin e këtyre personave pas vettingut politik”, deklaroi Haklaj për Report Tv.
Ndërsa drejtuesi i Lëvizjes Bashkë, njëkohësisht kandidat i pari në listën e Tiranës, Redi Muçi, tha se nëse arrijnë të fitojnë mandate deputetësh, nuk do i vendosin në favor të PD apo PS për formim qeverie nëse atyre do u duhen kartonët.
“Nuk do bëhet paskoalicion, sikurse nuk u bë para, Lëvizja Bashkë është kundër forcave binom PD-PS. Morëm 14 mijë vota në Tiranë më 2023. Do jemi surprizë në zgjedhjet e 11 majit. Kemi modele të ngjashme si Le Peni në Francë apo në Spanjë. Nuk kemi pse të mbetemi peng i partive të vjetra. Nuk i japim votat PS dhe PD për të formuar qeverinë. Ka të bëjë me qasjen tonë morale dhe konsistente, ndaj nuk kemi bërë koalicion me partitë e tjera. Janë parti individësh, grupime individësh, pasi as parti s’mund t’i quash ato. Ku secili grumbullon vota për vete për të hyrë në Parlament, për veten e tyre”, tha Muçi.
Ish-deputeti demokrat Azgan Haklaj tha se Chris LaCivita përfaqëson kompani lobuese, por që nuk do ketë sukses dhe as nuk e ka gjetur, pasi Sekretari Amerikan i Shtetit, Marko Rubio e ka lënë të qartë dhe të firmosur se “Sali Berisha mbetet i sanksionuar për korrupsion”.
Deklarata u bë sot në emisionin “Studio Live” të Report Tv, ku dhe kandidati për deputet në zgjedhjet e 11 majit për Koalicionin Euroatlantik të Lulzim Bashës ishte i ftuar.
“Chris LaCivita është kompani lobuese. Por Sekretari i Shtetit të SHBA, Marko Rubio (Marco Rubio), e ka lënë të qartë në raport, Sali Berisha i sanksionuar non grata për korrupsion. Është e qartë, s’ka lidhje me LaCivita. Rubio i ka hequr çdo ekuivok atij”, u shpreh Haklaj për moderatorin Arbër Hitaj.
Kurse në lidhje me listat e kandidatëve për deputetë, ai shprehet se mes PS dhe PD ka një marrëveshje të heshtur për disa prej tyre, duke i shkëmbyer në lista.
“I ke parë aleancat me listat e kandidatëve të PD-PS? E ke parë Alban Zenelin e PD në listën e PS në Kukës? Po marrëveshjen e Ramës? Po kandidati i Kavajës, kushëriri i Elvis Roshit në listën e PD-së? Kanë marrëveshje mes tyre ata”, tha ish-deputeti demokrat mes të tjerash.
Komente
