Luan Tali nga Fushë Kruja shmangu mëngjesin e sotëm një tragjedi, pasi arriti që të shpëtonte katër fëmijët e familjes Skënderi, që u asfiksuan si pasojë e tymit dhe zjarrit që përfshiu katin e katërt të pallatit ku banonin. Në një intervistë për Report Tv, banori që tashmë është kthyer në hero tregon momentet e tmerrit dhe si arriti që të shpëtonte fëmijët që ishin vetëm në banesë, pasi prindërit ishin në punë.
"Jam banor i këtij pallati. Ishte rreth orës 07:00, po shikoja njerëzit që po shikonin lart dhe dyshova se ka dicka. Unë banoj në katin e parë dhe dola, pashë tym në katin e tretë. U thirra pronarëve të hyrjes, por askush nuk u përgjigj, as fëmijët. Shkova me vrap në katin e tretë, i rashë derës nuk e hapi njeri, e hapa me forcë, por nuk kisha cfarë të shikoja ishin të asfiksuar dhe i nxora me forcë.
Të katërt fëmijët janë të vegjël, 10-11-vjeç më i madhi, e vogla 6-vjeç. Ndihem i trullos nga tymi dhe flaka, kush nuk e beson e provoftë vetë. Falenderoj Allahun që shpëtoi ata fëmijë, por të tjerat rregullohen. Nga këta nuk pres ndihmë, se të ishte për ndihmë nuk kishim arritur në këtë gjendje" u shpreh Luan Tali, që banon në katin e parë të pallatit që u përfshi nga flakët.
Ndërkohë që thirrjes për ndihmë të Talit iu përgjigjën edhe banorë të tjerë të pallatit. Marjana Çoku një nga banoret e pallatit që shkoi në ndihmë të fëmijëve. Ajo rrëfen se fëmijët ishin të tronditur. "Luan Talin e shikova duke ikur me vrap, kur shkuam atje, vetëm kur kemi marrë fëmijët me burrin tim dhe nusen e Luanit.
Fëmijët ishin të trembur, të tronditur, se ashtu jemi ne dhe jo ata që janë të vegjël. Nxorëm fëmijët jashtë dhe më pas morëm kovat e ujit për të shuar zjarrin dhe lajmëruam policinë" tha ajo. Nga zjarri u dogj kati i katërt i pallatit, por fatmirësisht nuk pati dëme në njerëz, ndërsa shkak nga të dhënat e para dyshohet se ka qenë një shkëndijë elektrike.
Komente
