Policia e Tiranës ka vënë nën hetim tre të rinj pasi gjatë ndeshjes së zhvilluar një ditë më parë ndërmjet Partizanit dhe Tiranës hodhën mjete piroteknike në stadium. Po ashtu në hetim është vënë edhe shtetasi A.G, pasi ka hyrë në fushë gjatë kohës kur u zhvillua ndeshja.
‘Specialistët për Hetimin e Krimeve të Komisariatit të Policisë Nr. 1 referuan materialet në Prokurori dhe nisi procedimi në gjendje të lirë për shtetasit A. Xh., 21 vjeç, A. G., 27 vjeç dhe një shtetas 15 vjeç, pasi ditën e djeshme, gjatë ndeshjes së futbollit mes ekipeve Partizani - Tirana, kanë kryer veprime të dhunshme, duke hedhur lëndë piroteknike, ndërsa shtetasi A. G. ka hyrë në fushën ku zhvillohej ndeshja. Policia vijon veprimet hetimore për identifikimin dhe procedimin penal dhe administrativ, të shtetasve të tjerë kanë kryer veprime të dhunshme dhe kanë lëndë piroteknike, gjatë dhe pas ndeshjes.’- njofton policia.
Partizani mposhti Tiranën në stadiumin ‘Air Albania’ me rezultatin 2-0 duke arritur të marrë kryesimin e renditjes së Superligës shqiptare me 40 pikë po aq sa bardh e blutë, por me një golavarazh më të lartë.
